Ҳиндистоннинг Ужжайн шаҳрида қарийб 600 йиллик Шаҳи масжидининг бир қисмини бузиш режасига қарши мусулмонлар намойишга чиқди. Намойишчилар ва политсия ўртасида тўқнашув юз бериб, 15 киши ҳибсга олинган.

Маҳаллий маъмурият масжиднинг бир қисмини олиб ташлаш режасини 2028-йилда шаҳарда ўтказиладиган Симҳастҳа Кумбҳ диний тадбирига тайёргарлик билан изоҳлаган. Расмийларга кўра, зиёратчилар ҳаракатини яхшилаш учун 900 метр узунликдаги йўлни кенгайтириш режалаштирилган.

28-сентабр куни масжиднинг йўл лойиҳасига тўғри келадиган қисмини олиб ташлаш ишлари бошлангач, асосан ёшлардан иборат гуруҳ бунга қарши чиққан. Политсия оломонга қарши таёқ ва кўздан ёш оқизувчи газ ишлатган. Ҳодиса юзасидан еттита жиноий иш очилган.

Ужжайн округи раҳбари Рошан Кумар Сингхнинг айтишича, Чҳатри чорраҳаси яқинидаги масжиднинг фақат кичик бир қисми олиб ташланади. 27-сентабр куни мусулмон жамоаси вакиллари билан учрашув ўтказилиб, бузилиши керак бўлган қисмларни уларнинг ўзлари олиб ташлашига келишилган.

Мадҳя-Прадеш Олий суди 9-сентабр куни бузиш режасига қарши берилган иккита аризани рад этган. Суд қарорида 2028-йилги тадбир вақтида зиёратчилар оқимини бошқариш, зарур қулайликларни яратиш ва жамоат хавфсизлигини таъминлаш зарурати қайд этилган.