Мактабгача ва мактаб таълими вазири Эъзоза Каримова Наманган вилояти Учқўрғон туманидаги 5 ёшли қизалоққа нисбатан зўравонлик содир этилгани айтилаётган боғчага борди. Вазир ҳолатни ўрганиш ва масъулларнинг фаолиятига баҳо бериш жараёнини шахсий назоратига олганини билдирди.

Каримованинг айтишича, воқеа ҳақида хабар топган пайтда у Андижон вилоятида бўлган. У Тошкентга қайтиш ўрнига Наманганга бориб, ҳодиса тафсилотлари, масъуллар томонидан кўрилаётган чоралар ва амалга оширилаётган ишлар билан танишган. Вазир тергов жараёнига халақит бермаслик ҳамда қизалоқнинг шахсига оид маълумотларни ҳимоя қилиш мақсадида воқеа тафсилотлари аввалроқ жамоатчиликка ошкор қилинмаганини тушунтирди.

Ҳодисага алоқадорликда гумон қилинаётган барча ходимлар ишдан олинган. Масъулларнинг хизмат вазифаларини қандай бажарганини аниқлаш ва уларнинг лавозимига лойиқлигини кўриб чиқиш учун махсус ишчи гуруҳ тузилган. Вазирнинг таъкидлашича, текширув давомида ким ўз вазифасини бажармагани ва ким бепарволикка йўл қўйгани аниқланади. Айбдор деб топилган шахслар қонунчиликда белгиланган тартибда жавобгарликка тортилади.

Шунингдек, айни пайтда мамлакатдаги барча мактабгача таълим ташкилотлари ходимларининг фаолияти ўрганилмоқда. Текширув раҳбарлардан тортиб техник ходимларгача бўлган барча ходимларни қамраб олади. Каримова болалар хавфсизлиги ҳар бир ходим ва раҳбарнинг асосий вазифаси эканини қайд этди.

Эслатиб ўтамиз, Намангандаги боғчада омбор мудири 5 ёшли тарбияланувчини зўрлагани ҳақида хабар берилган эди. Ҳолат юзасидан 12-сентабр куни Жиноят кодексининг 118-моддаси 4-қисми ҳамда 112-моддаси 1-қисми билан жиноят иши қўзғатилган. Гумонланувчи ушланган ва суд томонидан унга нисбатан қамоқ эҳтиёт чораси қўлланган. Ҳозирда дастлабки тергов ҳаракатлари давом этмоқда.