Олий Мажлис Қонунчилик палатасида 12 январь куни Ўзбекистон Либерал-демократик партияси фракцияси йиғилиши бўлиб ўтди. Унда “Самарқанд вилоятининг Самарқанд туманини тугатиш, Оқдарё, Паст Дарғом, Тойлоқ туманлари ва Самарқанд шаҳри чегараларини ўзгартириш тўғрисида”ги қарор лойиҳаси кўриб чиқилди.

Қарор лойиҳаси Самарқандни “миллионли шаҳар”га айлантириш, замонавий архитектура ечимларига эга турар жой ва нотурар биноларни барпо этиш, аҳолининг уй-жойга бўлган талабини тўлиқ қондириш ҳамда ҳудудларни инфратузилма билан таъминлаш орқали муносиб яшаш шароитларини яратишга қаратилган. Шу мақсадда Самарқанд тумани алоҳида маъмурий-ҳудудий бирлик сифатида тугатилиши кўзда тутилмоқда.

Фракция аъзоси Диёр Ҳусановнинг таъкидлашича, чегаралар ўзгартирилиши натижасида Самарқанд шаҳри ҳудуди 11,8 минг гектардан 28,9 минг гектаргача кенгаяди. Бу эса янги инвестиция ва қурилиш лойиҳалари учун кенг имкониятлар яратиб, туристик лойиҳалар, ўйин майдонлари, аквапарклар, ҳаво шарлари, истироҳат боғлари каби кўнгилочар ва дам олиш масканларини барпо этиш, шунингдек, яшил ҳудудлар, хизмат кўрсатиш объектлари ҳамда логистика марказлари қурилишига замин бўлади.

Шунингдек, ярим тайёр заргарлик буюмларини Ўзбекистон Республикаси божхона ҳудудидан ташқарига олиб чиқиш тартибини такомиллаштиришга қаратилган қонун лойиҳаси ҳам муҳокама қилинди. Асосий электорати тадбиркорлардан иборат фракция аъзолари ушбу ҳужжатга алоҳида эътибор қаратди.

Ушбу қонун лойиҳаси қимматбаҳо металлар ва тошлар, шунингдек, улардан тайёрланган заргарлик буюмларининг ноқонуний айланмасини камайтиришга қаратилгани қайд этилди. Муҳокамалар давомида депутатлар ҳуқуқий асослар, ижро механизмлари ҳамда коррупсиявий омилларни бартараф этиш масалалари юзасидан фикр билдирди.

Айрим депутатлар қонунчилик ҳужжатлари ўртасидаги хронологик номутаносиблик ва унинг тадбиркорлар фаолиятига таъсирига ҳам эътибор қаратди. Мунозаралар якунида қонун лойиҳаси депутатлар томонидан қўллаб-қувватланди.

Эслатиб ўтамиз, 2025 йил январь ойида ҳам Қонунчилик палатаси мажлисида депутатлар Самарқанд вилоятининг Самарқанд шаҳри, Самарқанд ва Оқдарё туманлари чегараларини ўзгартириш тўғрисидаги масалани кўриб чиққан. Мажлисда қарор лойиҳаси тегишли маҳалла фуқаролар йиғинлари, халқ депутатлари Самарқанд шаҳар, Самарқанд ва Оқдарё туманлари ҳамда вилоят Кенгашларида муҳокама қилиниб, чегараларнинг картографик чизмаси ва чегаралар чизиғининг таснифи маъқуллангани қайд этилган.

Шунингдек, қарор лойиҳасида ҳудуднинг чегараларини ўзгартириш ва унда белгиланган вазифаларни тизимли амалга ошириш мақсадида Ҳукуматга комплекс чора-тадбирларни амалга ошириш вазифаси юклатилган. Ҳудудда 112 км ички йўллар, пиёдалар ва велосипед йўлаклари, 6 км ер усти метро йўли, 2 та катта кўприк ҳамда 7,2 км ички коммуникация учун тоннель, 180 км ирригация қувури ҳамда 14 км канал ва кўплаб суғориш иншоотлари қурилиши режалаштирилган.

• Олий Мажлис
• Қарор
• Самарқанд