Шавкат Мирзиёев Тошкент шаҳридаги Амир Темур хиёбонига ташриф буюриб, буюк саркарда ва давлат арбоби Амир Темур ҳайкали пойига гулчамбар қўйди.

Айни кунларда мамлакатимизда Соҳибқирон таваллудининг 690 йиллиги кенг нишонланмоқда. Шу муносабат билан юртимиз бўйлаб маънавий-маърифий, илмий ва маданий тадбирлар ўтказилмоқда.

Амир Темур XIV асрда мураккаб тарихий шароитда миллий давлатчиликни тиклаб, юрт озодлиги йўлида улкан жасорат кўрсатган буюк сиймо сифатида тарихда муҳим ўрин эгаллайди. У асос солган салтанат жаҳон цивилизациясида чуқур из қолдирган Соҳибқирон мероси асрлар давомида дунё олимлари томонидан ўрганиб келинмоқда.

Бугунги кунда Янги Ўзбекистон шароитида Амир Темур ва темурийлар меросини чуқур ўрганиш, уни кенг тарғиб этиш алоҳида аҳамият касб этмоқда. Темурийлар Ренессанси эса янги Уйғониш даврини барпо этишда муҳим маънавий асос бўлиб хизмат қилмоқда. Соҳибқироннинг “Куч – адолатда” деган ҳикмати бугунги ислоҳотларда ҳам ўз ифодасини топмоқда. Мамлакатимизда адолатли жамият қуриш, инсон қадрини улуғлаш, илм-фан ва бунёдкорликни ривожлантириш борасидаги ишлар айнан шу ғояларга уйғун ҳолда олиб борилмоқда.

Ўзлигимизни англаш, бой тарихимизни тиклаш ва аждодларимиз меросини келажак авлодга етказиш мақсадида кейинги йилларда йирик маънавий-маърифий масканлар барпо этилди. Жумладан, Тошкентда Ислом цивилизацияси маркази, Самарқандда Имом Бухорий мажмуаси бунёд этилди. Шунингдек, 30 йил аввал қурилган Темурийлар тарихи давлат музейи ҳам замонавий талаблар асосида тубдан қайта таъмирланди.

• Амир_Темур
• Шавкат Мирзиёев