Таиланд ва Камбоджа 29 июль куни маҳаллий вақт билан 00:00 дан бошлаб ҳеч қандай шартсиз ва зудлик билан ўт очишни тўхтатишга келишиб олди. Бу ҳақда CNN хабар берди.

Келишув Жануби-Шарқий Осиё давлатлари уюшмаси (ASEAN) раиси сифатида воситачилик қилган Малайзия иштирокида имзоланган. Музокаралар Камбоджа бош вазири Хун Манет ва Таиланд муваққат бош вазири Пҳумтам Вечаячай ўртасида ўтган.

Унга кўра, 29 июль куни икки давлат ҳарбий қўмондонлари алоҳида учрашув ўтказади. Камбоджа ҳукумати Таиланд томонидан икки ҳудудга зарба берилганини билдирган, Таиланд армияси эса 28 июль куни эрталаб 3 та провинцияда тўқнашувлар бўлганини тасдиқлаган.

Қўшма Штатлар ва Хитой музокараларга кузатувчи сифатида ёрдам таклиф этган. АҚШ давлат котиби Марко Рубио баёнотига кўра, америкалик расмийлар 28 июль куни музокараларда шахсан иштирок этган.

Ҳисоб-китобларга кўра, икки давлат ўртасидаги сўнгги ҳужумларда 35 киши ҳалок бўлиб, 200 дан ортиқ одам жароҳат олган. Чегарадаги бу можаролар ўнлаб йиллардан буён давом этиб келмоқда.

Аввалроқ АҚШ президенти Доналд Трамп 26 июль куни икки давлатни оташкесимга келишиб олганини эълон қилган эди.

• Битим
• Камбоджа
• Tailand