АҚШ президенти Доналд Трамп Канадада ишлаб чиқарилган винолардан тортиб хоккей таёқчалари ва сементгача бўлган айрим товарларга 50 фоизлик бож жорий этди. Бу ҳақда Оқ уй хабар берди.

Мазкур қарор Канаданинг Америка маҳсулотларига нисбатан “камситувчи муносабати”га жавобан қабул қилинган.

“Шу тариқа, президент Трамп Канаданинг Америка савдосига нисбатан камситувчи муносабати туфайли юзага келган юк ва камчиликларни қоплайди ҳамда Американинг энг муҳим экспорт товарлари — автомобиллар, алкогол ва сут маҳсулотлари учун тенг рақобат шароитларини яратади”, дейилади хабарда.

Янги божлар энергия манбалари, калийли ўғитлар, балиқ ва муҳим минералларга дахл қилмайди, аммо илгари АҚШ, Мексика ва Канада ўртасидаги келишув (УСМCА) билан божлардан ҳимояланган маҳсулотларга таъсир қилади.

Трамп маъмуриятининг юқори мартабали амалдорлари Канадани адолатсиз савдо амалиётида айблаб, унинг провинсиялари АҚШдан спиртли ичимликлар сотиб олишни тўхтатганини, АҚШ автомобилларига божлар жорий этганини ва Америка пишлоғини “камситгани”ни таъкидлади.

Канада АҚШнинг иккинчи йирик савдо шериги бўлиб, ўтган йили икки давлат ўртасидаги товар айирбошлаш ҳажми 716 миллиард долларни ташкил этди.

Оқ уй матбуот хизматининг таъкидлашича, Трампнинг ҳаракатлари Канадани жавобгарликка тортишга қаратилган, сабаби унинг “камситувчи муносабати меҳнаткаш америкаликлар аҳволини қийинлаштириб, уларни ноқулай вазиятга солган”.

Чекловлар Канада маҳсулотларининг аксариятига таъсир қилади.

“Президент ўтган йилнинг бошида амалга оширган савдо сиёсатига фақат икки давлат — Хитой ва Канада жавоб чораларини кўрганди”, деди АҚШ президенти маъмуриятининг юқори мартабали расмийси Финанcиал Тимес нашрига.

Газета Трампнинг қарори янги “Шимолий Америка савдо уруши”ни келтириб чиқариши мумкинлигини тахмин қилмоқда.

13-июль куни Трамп Канада ҳукуматини ўрмонлардаги чиқиндиларни тозалашдан бош тортишда айблади. У мазкур ҳолат АҚШда ҳавонинг ифлосланишига олиб келишини айтиб, Канадага ушбу “бепарволик” учун божларни ошириш билан таҳдид қилди.

Январ ойи охирида Трамп Канадага, агар у Хитой билан савдо битими тузадиган бўлса, АҚШга олиб кириладиган барча товарларига 100 фоизлик божлар қўлланишини айтди. Шунингдек, Канада бош вазири Марк Карнини “губернатор” деб атади.

АҚШ президенти иккинчи муддатининг бошидаёқ экспортининг 75 фоизи Штатлар ҳиссасига тўғри келадиган Канадага нисбатан божлар жорий қилган эди. 2025-йил 1-августдан бошлаб Трамп умумий божни 35 фоизгача оширди. Илгари, 2025-йил март ойидан бошлаб, аксарият маҳсулотларга 25 фоизлик ставка амал қилиб келаётганди.