Манчестернинг собиқ мэри Энди Бёрнем Буюк Британиядаги ҳукмрон Лейбористлар партиясининг янги раҳбари этиб сайланди. Партия парламентдаги кўпчиликка эга бўлгани сабабли у 20 июль куни Кир Стармер ўрнини эгаллаб, мамлакат бош вазири лавозимига киришиши кутилмоқда.

Бёрнемнинг сайлангани 17 июль куни Лондонда ўтказилган Лейбористлар партиясининг махсус конференциясида эълон қилинди. Уни 379 нафар лейборист депутат ҳамда партия билан боғлиқ 23 та ташкилот қўллаб-қувватлади. Бошқа номзод бўлмагани боис у партия раҳбари этиб тасдиқланди.

1970 йилда Ливерпул яқинидаги Эйнтри шаҳрида туғилган Энди Бёрнем Лейбористлар партиясининг тажрибали сиёсатчиларидан бири ҳисобланади. У аввал Буюк Британия соғлиқни сақлаш ҳамда маданият, оммавий ахборот воситалари ва спорт вазири лавозимларида фаолият юритган. 2017 йилдан буён Буюк Манчестер мэри сифатида ишлаб, жамоат транспорти, уй-жой ва ижтимоий ҳимоя соҳаларидаги ташаббуслари билан танилган. COVID-19 пандемияси даврида марказий ҳукуматга нисбатан қатъий позицияси туфайли матбуотда «Шимол қироли» номи билан тилга олинган.

Бёрнем 2010 ва 2015 йилларда ҳам Лейбористлар партияси раҳбарлиги учун курашган, бироқ ғалаба қозона олмаган. Кейинчалик Буюк Манчестер мэри сифатида сиёсий нуфузини мустаҳкамлаб, 2026 йилда парламентга қайтди.

Дастлабки нутқида у партиядаги ички келишмовчиликларга барҳам бериш, ҳудудларга кўпроқ ваколат бериш ҳамда сиёсатни аҳолининг кундалик муаммоларини ҳал этишга йўналтиришга ваъда берди.

«Мамлакат янги сиёсатга муҳтож. Сиёсий очко тўплашга эмас, муаммоларни ҳал қилишга эътибор қаратишимиз керак», — деди Бёрнем.

Шунингдек, у Кир Стармерга миннатдорлик билдириб, унинг раҳбарлигида Лейбористлар партияси 2024 йилги парламент сайловида ғалаба қозониб, 14 йиллик консерваторлар ҳокимиятига якун ясаганини таъкидлади.