“Куни кеча яъни 26 июль куни Тошкент шаҳрининг Юнусобод туманида жойлашган 110/35/10 КВли “Юнусобод” подстанциясидан таъминланувчи “Универсам-1” ва “Универсам-2” узатмаларига уланган ер ости кабель тармоқлари “Veolia Energy” МЧЖ ХК томонидан олиб борилган ер қазиш ишлари натижасида шикастланган.

Мазкур ишлар “Veolia Energy” МЧЖ ХК томонидан туман электр таъминоти корхонаси билан келишувсиз амалга оширилган.

Бунинг натижасида юқори кучланишли кабель тармоғида носозлик юзага келиб, Шаҳристон тақсимлаш пункти билан “Юнусобод” подстанцияси оралиғидаги электр узатиш тармоқлари ишдан чиқди.

Оқибатда туманнинг 14 та МФЙ ҳудудидаги хонадонларда электр таъминоти вақтинча тўхтади.

Ҳозирда “Тошкент шаҳар электр тармоқлари” МЧЖ томонидан махсус тезкор авария-бригадалари носозликларни тезкорлик билан бартараф этиш ишларини олиб бормоқда.

Электр таъминоти таъмирлаш ишлари якунлангач босқичма-босқич тикланади” – дея изоҳ қолдирган электр таъминоти корхонаси ўз расмий пресс-релизида.

Аммо орадан бироз муддат ўтиб, “Veolia energy” хусусий компанияси баёнот бериб, қуйидагиларни ёзиб қолдирган:

“Оммавий ахборот майдонларида Тошкент шаҳри, Амир Темур кўчаси, Юнусобод туман суди рўпарасида олиб борилган ишлар мутасадди ташкилотлар билан келишилмасдан амалга оширилгани ва натижада кабель зарарлангани ҳақидаги хабарлар юзасидан, “Veolia Energy” қуйидагиларни маълум қилади:

Кўрсатилган манзилдаги ишлар тасдиқланган Тошкент шаҳар иситиш тизимини куз-қиш мавсумига тайёрлаш дастури доирасидаги режали иссиқлик тармоқларини янгилаш жараёнининг бир қисмидир. Барча ер ости ишлари расмий рухсатнома асосида пудратчи ташкилот томонидан амалга оширилмоқда.

“Ҳудудий электр тармоқлари” ДУК Тошкент филиали ва тегишли хизмат ташкилотлари билан келишувлар ишлар бошланишидан олдин олинган.

Қазиш ишлари давомида кабелнинг шикастланиши бўйича ҳолат қўшимча равишда ўрганилади. Бироқ ишлар мутасадди идораларни хабардор қилмасдан ва уларнинг розилигисиз бажарилгани ҳақидаги даъволарни қатъиян рад этамиз.

Биз очиқлик ва масъулият тамойилларига содиқ қолган ҳолда, юзага келган ҳолат юзасидан барча манфаатдор томонлар билан очиқ мулоқотга тайёр эканлигини билдиради”

Иккала томон ҳам мазкур ахборотларидан кейин ҳали расмий хабар берганича йўқ.

• Электр энергияси
• Elektr stansiya
• Elektronika
• elektr