Кеча, 26 март куни Тошкент шаҳар Олмазор тумани Қорасарой кўчаси 69-уйнинг тунда ҳокимлик вакиллари ҳамда МИБ ходимлари томонидан бузиб ташлангани ҳақичда маълум қилинган эди.

Xabardor.uz сўровига кўра Тошкент шаҳар суди матбуот хизмати Фуқаролик ишлари бўйича Шайхонтоҳур туманлараро судининг 2022 йил 17 февралдаги қарори асосида маълумотни тақдим қилди.

Унга кўра, даъвогар Олмазор туман ҳокимияти 2022 йил 6 январда жавобгарлар Ш.А. ва М.А. га нисбатан мажбурий кўчириш ҳақидаги даъво аризаси билан фуқаролик ишлари бўйича Шайхонтоҳур туманлараро судга мурожаат қилиб, жавобгарларни оила аъзолари билан Тошкент шаҳар Олмазор тумани, Ёғду кўчасида янги қурилган 6-уйдаги 2 та хонадонга мажбурий кўчириш ҳақида қарор қабул қилишни сўраган.

Қайд этилишича, жавобгарлар истиқомат қилиб келган хонадон Тошкент шаҳар ҳокимининг 2017 йил 30 июндаги 832-сонли ва 2019 йил 27 майдаги 764-сонли қарорига асосан бузилишга тушган.

Олмазор тумани ҳокимияти вакиллари 2021 йил 10 декабр, 13 декабр ва 14 декабр кунлари хонадон эгалари билан гаплашиб, охирги марта уларга туман ҳудудидан 2 та хонадон таклиф қилинган.

Хонадон эгалари эса кўрсатилган хонадонларни олишни рад этган ва бузилаётган уй-жой ўрнига Шайхонтоҳур тумани ҳудудида қурилган янги уйлардан олиб беришни ёки ушбу бузилаётган уй-жой ўрнига 4 млрд 360 млн сўм (400 минг АҚШ доллари) миқдорида пул маблағи берилишини талаб қилган.

Ўз навбатида мазкур уй-жой билан 2021 йил 27 июлда баҳолаш ишлари олиб борилган. Баҳолаш натижасида у бозор қийматига кўра 763 млн 753 минг сўмга баҳоланган. Фуқарога таклиф этилган 2 та хонадон эса туман ҳокимлиги ва сотувчи ўртасида икки томонлама келишув битимига асосан 1 млрд 182 млн 384 минг сўмга баҳоланиб туман ҳокимлиги балансига олинган.

Уй-жой эгаларининг рад жавоблари сабабли туман ҳокимияти судга Ш.А. ва М.А.ни оила аъзолари билан Тошкент шаҳар Олмазор тумани Ёғду кўчасида янги қурилган 6-уйдаги 2 та хонадонга мажбурий кўчириш ҳақида даъво аризаси киритган.

Фуқаролик иши бўйича суд мажлиси 2022 йил 17 февраль кунига тайинланган ва чақирувга қарамасдан судга келмаган жавобгарлар иштирокисиз ўтган суд мажлисида иш сиртдан кўрилиб, даъвогар Олмазор туман ҳокимиятининг даъво аризасини қаноатлантириш ҳақида ҳал қилув қарори чиқарилган.

Ҳал қилув қарори 2022 йил 24 февраль куни жавобгарларга жўнатилган.

Ҳал қилув қарори ижро қилиш учун 2022 йил 17 март куни Олмазор тумани мажбурий ижро бюросига юборилган.

2022 йил 24 март куни жавобгарлар томонидан фуқаролик ишлари бўйича Шайхонтоҳур туманлараро судининг 2022 йил 17 февралдаги сиртдан чиқарилган ҳал қилув қарорини бекор қилиш тўғрисида судга ариза келиб тушган.

Мазкур аризанинг кўрилиши вақти бўйича тарафларга хабар берилган.   

• Ҳуқуқ
• Снос
• Суд
• Тошкент