Тhe New York Times ёзишича, Доналд Трамп президентлик лавозимига қайтгач, унинг оилавий бизнеси фойда кўра бошлади. Сўнгги бир ой ичида Трамп компанияларига камида 2 миллиард доллар даромад топган.

“Хусусан, $TRUMP криптовалютасининг ишга туширилиши камида 174 миллион доллар даромад келтирган. Бундан ташқари, БАА Трамп оиласининг янги крипто-лойиҳаси – World Liberty Financial компаниясига инвестисион фирма орқали 2 млрд доллар сармоя киритган. Мазкур компания Эрик Трамп ва кичик Доналд Трамп бошчилигида йилига ўнлаб миллион доллар фойда олиши кутилмоқда.

Шунингдек, Қатар Трамп бренди остида мамлакатда бунёд этилаётган 5,5 млрд долларлик пляжли голф мажмуаси ва виллалар лойиҳасини молиялаштиришга ёрдам берган. Трамплар оиласи бу лойиҳадан лицензион тўловлар ва бошқарув хизматлари эвазига миллионлаб доллар ишлаб олади.

НЙТъга кўра, Саудия Арабистонидаги бир кўчмас мулк компанияси эса “Trump International Hotel and Tower” меҳмонхонаси учун 1 млрд доллар сармоя киритган. Худди шу компания Трамп бренди остида Саудия Арабистони ва Уммонда янги меҳмонхоналар, голф майдонлари ва ҳашаматли миноралар қуришни режалаштирмоқда. Буларнинг барчаси Трамп номидан фойдаланишга асосланган бренд битимлари бўлиб, уларга яна миллионлаб доллар даромад келтиради.

• АҚШ
• Бизнес
• Daromad
• Трамп