“Ўзбекистоннинг Истанбул шаҳридаги Бош консулхонаси ҳамда ушбу шаҳардаги Миграция агентлиги ваколатхонаси томонидан она ва унинг қизи ватанга қайтарилди”, деб хабар қилмоқда “Дунё” ахборот агентлиги.

Туркияда меҳнат фаолияти билан шуғулланиш мақсадида ҳамюртимиз оғир касалликка чалингани сабабли мураккаб вазиятга тушиб қолган. Шундан сўнг у, Бош консулхонага мурожаат қилган. Аниқланишича, унинг 12 ёшли қизи ҳам онаси билан бирга бўлган.

Бош консуллик уларнинг аҳволини тезда ўрганиб, керакли ёрдам кўрсатган. Оилани Ўзбекистонга қайтариш учун барча ҳужжатлар тайёрланган ва Миграция агентлиги ваколатхонаси кўмагида авиачипталар сотиб олинган. Бироқ, онанинг оёғи сингани сабабли уларнинг ватанга қайтиши маълум муддатга кечиктирилади.

Шифокорлар назоратида онанинг аҳволи барқарорлашгач, унинг оёғига муваффақиятли жарроҳлик амалиёти ўтказилиб, протез қўйилгач, молиявий аҳволи оғир бўлгани, сўнгги уч ой давомида меҳнат фаолияти билан шуғуллана олмагани инобатга олиниб, оилага моддий ёрдам кўрсатилган.

Бош консулхонанинг ташаббуси билан “Ўзбекистон маданияти, бирдамлик ва ҳамкорлик жамияти”, “Узбекистан Airways” авиакомпаниясининг Туркиядаги вакиллиги ҳамда турли диаспора ташкилотлари кўмагида она ва қизига зарур кўмак кўрсатилиб, улар ватанга қайтарилган.

Айни пайтда уларнинг Ўзбекистондаги даволаниш ва реабилитация жараёнлари Ижтимоий ҳимоя миллий агентлиги, Оила ва хотин-қизлар қўмитаси ҳамда маҳаллий ҳокимият идоралари билан ҳамкорликда давом этмоқда.

• Истанбул
• Ўзбекистонлик
• Туркия