Украина Олий радаси мамлакат мудофаа вазирлигига янги раҳбар тайинлади. Қонунчилар Михаил Фёдоров номзодини маъқуллади. Шундай қилиб, у кенг кўламли уруш бошланган 2022 йилдан буён ушбу лавозимни эгаллаган тўртинчи вазир бўлди. Тайинлов Россия армияси қатор йўналишларда ҳужум ҳаракатларини жадаллаштирган бир вақтда бўлиб ўтди.

34 ёшли Михаил Фёдоров бунгача Украина бош вазирининг биринчи ўринбосари ҳамда рақамли трансформация вазири лавозимларида фаолият кўрсатган. Мулозим Украинада ва мамлакат ташқарисида давлат бошқаруви, шунингдек, мудофаа соҳасига замонавий технологияларни жорий этиш бўйича асосий ташаббускорлардан бири сифатида танилган.

Фёдоров ўзининг парламентдаги чиқишида Украина армиясини замонавийлаштириш, мамлакат ҳарбий салоҳиятини рақамли технологиялар, дронлар ва инновацион ечимлар асосида кучайтиришга эътибор қаратишини таъкидлади. У, шунингдек, уруш шароитида тезкор қарорлар, технологик устунлик ва мослашувчан бошқарув ҳал қилувчи аҳамиятга эга эканини қўшимча қилди.

“Биз дунёда биринчи бўлиб дронлардан иборат ҳужум полкларини ташкил этдик. Улардан бири яқинда Купянскни ишғолдан озод қилишда асосий зарбдор куч бўлди”, – деган янги вазир.

Кузатувчилар Фёдоровнинг энг муҳим лавозимлардан бирига тайинланишини Украина мудофаа сиёсатида замонавий технологияларга эътиборни кучайтирмоқчи бўлаётгани билан изоҳлаган. Аввалроқ у дронлар, рақамли бошқарув тизимлари ва ҳарбий инновацияларни жорий этиш орқали армиянинг жанговар имкониятларини оширишга ҳисса қўшганди.

• Mudofaa vazirli
• Ukraina doni