Bloomberg агентлигининг хабар беришича, февраль ойининг дастлабки 18 кунида Хитой портларига кунига 2,09 миллион баррель миқдордаги Россия хом нефти етказиб берилган. Бу кўрсаткич январда 1,72 миллион ва декабрда 1,39 миллион баррелни ташил қилган. Бу ўсиш Ҳиндистоннинг Россиядан нефть харид қилишни тўхтатиши ортидан юзага келган камайишни тўлиқ қоплаган.

Сўнгги ойлар давомида Ҳиндистонга Россия нефтининг импорти кунига тахминан 1,2 миллион баррелни ташкил қилмоқда. Бу 2025 йил июнь ойидаги энг юқори кўрсатгичига нисбатан 40 фоиз камроқ.

Қайд этилишича, қайта йўналтириш Россия нефтининг барча навларига таъсир қилган. Ҳозирда Хитойга Болтиқ ва Қора денгиз портларидан Уралс юкланган танкерлар юборилиши, шунингдек, Арктикадан етказиб берилаётган нефть ҳажми тобора ортиб бормоқда.

“Хитойнинг нефтни қайта ишлаш заводларига сезиларли чегирмалар туртки берди. Ҳозирда Уралс нефтининг Хитойга етказиб берилиши Brent нефть навига нисбатан баррелига 12 доллар чегирма билан сотилмоқда. Айни пайтда Хитой Россия нефтини харид қилиш учун жуда катта имкониятдан фойдаланмоқда, чунки у ҳар қандай ортиқча нефть учун энг сўнгги харидор вазифасини ўтамоқда”, – дейилади хабарда.

• Ҳиндистон
• Импорт
• Россия
• Хитой
• нефть