Тошкент вилояти Янгийўл шаҳрида фуқаро ўз итини гўшти учун ўлдирди. Бу ҳақда “Меҳр ва оқибат” ҳайвонларни ҳимоя қилиш жамияти хабар бермоқда.

Жамиятнинг Call-марказига янгийўллик фуқаро А.А. мурожаат қилган. У танишидан фуқаро ўзи итини ўлдираётгани акс этган видеоларни олган. “Меҳр ва оқибат” ИИВга расмий мурожаат билан чиқиб, ҳайвонларга нисбатан шафқатсизлик қилган шахсни аниқлаш ва уни қонун доирасида жазолашни сўраган.

“Эколог” жамоат бирлашмаси тезкор ўрганиш ишлари олиб борилганида ушбу шахс 30 ёшли М.А. эканлиги аниқланган. У Янгийўл шаҳрида истиқомат қилади. Мавжуд маълумотларга кўра, фуқаро бундай ҳаракатларни доимий равишда амалга ошириб келган.

“Ушбу шахс ўзининг хусусий уйида мунтазам равишда итларни, жумладан, ўзининг итларини ҳам, шафқатсизларча ўлдириб, гўштини истеъмол қилиб келган — ишонган, ёнида яшаган ва хиёнатни кутмаган жониворларни. Бундан ташқари, у бу итлардан туғилган кучукчаларни ҳам сўйган”, – дейилади “Эколог” жамоат бирлашмаси хабарида.

Воқеа жойига волонтёрлар ва ҳайвонларни ҳимоя қилувчилар маҳалла нозирлари билан бирга етиб келганида, уйда унинг онаси ва синглиси ҳам бўлган. Она ўғлининг бундай ишни қилиши мумкинлигига ишонмаслигини айтган. Ҳатто унга видеоёзувлар кўрсатилгандан кейин ҳам инкор қилган.

“Эколог” жамоат бирлашмаси ҳам ушбу шахсга нисбатан қонуний чора кўрилишини сўраган.

Маълумот учун, маъмурий жавобгарлик тўғрисидаги кодекснинг 111-моддасига кўра, ҳайвонларга нисбатан шафқатсиз муносабатда бўлиш, яъни уларни ғаразли ёки бошқа паст ниятларда қийноққа солиш ёки уларга азоб бериш, БҲМнинг 3 бараваридан 5 бараваригача (1 миллион 236 минг сўмдан 2 миллион 60 минг сўмгача) миқдорда жарима солишга сабаб бўлиши белгиланган.

Жиноят кодексининг 202-1-моддасига кўра, ҳайвонларга нисбатан шафқатсиз муносабатда бўлиш маъмурий жавобгарликдан кейин содир этилган бўлса, БҲМнинг 50 бараваригача (20 миллион 600 минг сўмгача) жарима ёки 6 ойгача озодликдан маҳрум қилиш билан жазоланади.

• Экология
• Ҳайвон
• Тошкент