АҚШнинг Техас штатида жазирама иссиқ сабабли юзага келаётган оғир шароитлар ортидан федерал судья барча қамоқхоналарга 2029 йил охиригача кондиционер ўрнатишни буюрди. Бу ҳақда «Тҳе Texas Tribune» хабар берди.

АҚШ округ судьяси Роберт Питман ўз қарорида кондиционерсиз қамоқхоналардаги шароитлар АҚШ Конституциясининг шафқатсиз ва ғайриоддий жазолардан ҳимоя қилишни назарда тутувчи саккизинчи тузатишига зид эканини қайд этган. Судья Техас Жиноят ишлари бўйича департаментига барча қамоқхоналарга кондиционер ўрнатиш ишларини 2029 йил 31 декабргача якунлашни топширган.

Маълумотларга кўра, жорий йилнинг 1 сентябрь ҳолатига 104 та муассасанинг учдан биридан сал кўпроғигина тўлиқ кондитсионерланган бўлиб, қарийб 90 минг маҳбус ҳамон шундай шароитсиз қолмоқда. Суд қарорида 2023–2025 йилларда камида 9 нафар маҳбус ҳаддан ташқари иссиқ туфайли вафот этгани келтирилган.

Техас Жиноят ишлари бўйича департаменти суд қарорига рози эмаслигини ва апелляция беришини маълум қилган. Идора қамоқхоналарда совутиладиган хоналар, вентиляторлар ва совуқ сув каби чоралар кўрилаётганини, шунингдек, совутиладиган ўринлар сонини босқичма-босқич ошириш режалаштирилганини билдирган. Бироқ барча қамоқхоналарга тўлиқ кондиционер ўрнатиш қиймати 1,5 миллиард долларгача етиши мумкин. Судья департаментдан жараён бўйича ҳар олти ойда ҳисобот тақдим этишни талаб қилган.