Мексикада президент Клаудия Шейнбаумнинг сиёсатига қарши намойишлар авж олди. Намойишлар Уруапан шаҳри мери Карлос Мансо отиб ўлдирилгани ортидан бошланди. The Guardian хабар беришича, Мехико шаҳри бўйлаб ўтказилган маршларда камида 120 киши, асосан, полиция ходимлари жароҳатланган. 

Намойишлар 15 ноябрь куни “Z авлод” вакиллари томонидан уюштирилган. Бироқ мухолифат партияларининг катта ёшли тарафдорлари ҳам уларга қўшилган.

“Бу сафарбарлик бир неча соат давомида тинч йўл билан давом этди ва ривожланди, аммо кейинчалик ниқоб таққан бир гуруҳ шахслар зўравонлик ҳаракатларини содир эта бошлади”, – деди Мехико шаҳри хавфсизлик хизмати бошлиғи Пабло Васкес.

У 100 нафар полициячи жароҳатлангани, улардан 40 нафари кўкариш ва кесилган жароҳатлар сабаб шифохонага ётқизилганини маълум қилган. 20 нафар норозилик билдирувчи фуқаролар ҳам жароҳат олган.

Шейнбаум 2024 йил октябрь ойидан бери ҳокимиятда, унинг сиёсатини маъқуллаш рейтинги 70 фоиздан ошади. Бироқ бир нечта шов-шувли қотилликлар туфайли президентнинг хавфсизлик сиёсати танқидга учради.

Намойишчилар Шейнбаум яшайдиган ва ишлайдиган Миллий сарой олдида тўпланиб, бино атрофидаги металл тўсиқларнинг бир қисмини қулатган. Мажмуа ҳудудини қўриқлаётган полиция панжараларни ураётган намойишчиларни ушлаб туриш учун кўздан ёш оқизувчи газлардан фойдаланган.

• Мексика
• Намойиш
• norozilik
• zumerlar