Prezident farmoniga muvofiq, sud tizimida korrupsiyaviy xavf-xatarlarni erta aniqlash va ularning oldini olishga qaratilgan yangi mexanizmlar joriy etilmoqda.  Shu maqsadda Oliy sud tarkibida Komplayens nazorati xizmati tashkil etiladi. Mazkur xizmat sud apparati xodimlari faoliyatidagi korrupsiyaviy xavflarni aniqlash va baholash, manfaatlar to‘qnashuvining oldini olish hamda qonunchilik va kasb etikasi talablariga rioya etilishini monitoring qilish bilan shug‘ullanadi. Farmonga ko‘ra, sud apparati xodimlari va ularning oila a’zolariga tegishli daromadlar hamda mol-mulkni deklaratsiya qilish tizimi joriy etiladi.

Bu esa manfaatlar to‘qnashuvi va korrupsiyaviy xavflarni dastlabki bosqichda aniqlash imkonini kengaytiradi. Shuningdek, sud tizimiga ishga qabul qilinayotgan nomzodlarning kasbiy va shaxsiy fazilatlari, halolligi hamda korrupsiyaga qarshi barqarorligi baholanadi. Ishga qabul qilish jarayonlari ochiq tanlov asosida, meritokratiya tamoyillariga muvofiq amalga oshiriladi.

Bundan tashqari, korrupsiya va boshqa qonunbuzilishlar haqida xabar bergan xodimlarni himoya qilish mexanizmlari kuchaytiriladi hamda fuqarolar uchun xavfsiz murojaat kanallari yaratiladi. Yangi tartiblarning asosiy maqsadi — sud tizimida shaffoflik, halollik va qonuniylikni yanada mustahkamlash, fuqarolarning odil sudlovga bo‘lgan ishonchini oshirishdan iborat.