Tadqiqotda aytilishicha, 2050-yilgacha Osiyoda uzoqni ko‘ra olmaydiganlar 69 foizga, rivojlanayotgan davlatlarda esa 40 foizga yetishi mumkin.

Britaniyaning Oftalmologiya jurnalida tadqiqot chop etilgan. Unga ko‘ra, dunyodagi bolalar va o‘smirlarning uchdan biri miopiyadan aziyat chekmoqda. Miopiya bu – uzoqni ko‘ra olmaslik kasalligidir. Statistikaga ko‘ra, 2020-yilda qariyb 2,6 milliard kishi miopiyadan qiynalgan. 2030-yilgacha bu ko‘rsatkich 3,4 milliardga yetishi taxmin qilinmoqda.

Dastlab uzoqni ko‘ra olmaslik jiddiy muammo bo‘lib ko‘rinmaydi va uni linza yoki ko‘zoynaklar bilan tuzatish mumkin. Lekin miopiya ko‘rishning buzilishiga va ko‘rlikka olib borishi mumkin. Hozirgi trendlar miopiyaning darajasi o‘sib borayotganini ko‘rsatadi va bu “yuqori miopiya” deb nomlanadi. Bunda miopiya rivojlanib, katarakta, glaukoma darajasigacha boradi.

Miopiya bolalarda ertaroq boshlanyapti va yuqori miopiya bilan bog‘liq muammolarning paydo bo‘lishiga olib kelyapti. Tadqiqotda 1990-yildan 2023-yilgacha bolalarda miopiya 3 barobar ortganini ko‘rsatadi va o‘sish asosan pandemiyadan keyin yuqoriroq bo‘lgan. Bu jamiyatlar uchun qimmatga tushyapti. Miopiya har yili 200 milliard dollarlik xalqaro mahsuldorlikning yo‘qolishiga sabab bo‘lyapti. Agar kasallik davolanmasa, bolalarning hayot sifatiga salbiy ta’sir qiladi va akademik o‘zlashtirishini pastga tushiradi.

• Jahon
• Kasallik
• qiziqarli
• salomatlik
• tadqiqot