23-24-oktyabr kunlari AQSh Xalqaro taraqqiyot agentligi (USAID) ma’muri Samanta Pauer O‘zbekistonga keladi. Bu haqda agentlik matbuot xizmati xabar bermoqda.

Xabarga ko‘ra, AQSh Xalqaro taraqqiyot agentligi ma’muri Mintaqaviy aloqalar bo‘yicha C5+1 formatidagi (Markaziy Osiyo mamlakatlari + AQSh) vazirlar konferensiyasini o‘tkazadi hamda “AQSh hukumatining mintaqa davlatlarining mustaqilligi, suvereniteti va farovonligiga sodiqligini tasdiqlaydi”.

Ma’lumot uchun, 2015-yildan buyon “S5+1” muloqoti AQSh hukumatining Qozog‘iston, Qirg‘iziston, Tojikiston, Turkmaniston va O‘zbekiston bilan o‘zaro hamkorlik qilish uchun asosiy diplomatik platformasi bo‘lib kelmoqda.

Taraqqiyot masalalari bo‘yicha vazirlar uchrashuvi mintaqaviy o‘zaro aloqalar, savdo, iqtisodiy o‘sish va tadbirkorlik, iqlimiy va energetik yechimlar, shuningdek, yoshlar uchun imkoniyatlarga urg‘u qaratgan holda Markaziy Osiyoda inklyuziv, barqaror iqtisodiy taraqqiyotni rag‘batlantirish bo‘yicha aniq choralar ko‘rish uchun Markaziy Osiyoning beshta davlat vazirini to‘plagan ushbu platformani mustahkamlaydi.

• AQSh
• Markaziy_Osiyo