Buyuk britaniyalik 99 yoshli Xelga Daffi samolyot qanotida parvoz qilgan eng keksa ayol sifatida Ginnesning rekordlar kitobiga kirdi. Bu haqda BBC xabar berdi.

Xelga Daffi Uiltshir grafligining Devizes shahridagi qariyalar uyida yashaydi. U 97 yoshli Betti Bromeyjning samolyot qanotida uchgani haqidagi xabarni ko‘rgach, o‘zi ham shunday parvozni amalga oshirishga qaror qilgan.

Daffi Glostershir grafligining Sirensester shahridagi RFC Rendcomb aerodromida parvoz qilgan. U kichik samolyot qanotiga maxsus moslamalar yordamida mahkamlangan holda uchgan va parvoz davomida tomoshabinlarga qo‘l silkitgan.

“Qo‘rqmadim, chunki juda hayajonda edim”, — degan Xelga parvoz taassurotlari haqida. U qanotda uchish hissini “o‘zgacha” deb ta’riflagan.

Parvoz yakunida Xelgaga Ginnesning rekordlar kitobi vakillari tomonidan rasmiy sertifikat topshirilgan. Shuningdek, u ushbu parvoz orqali Wiltshire and Bath Air Ambulance xayriya tashkiloti uchun mablag‘ to‘plagan. Tashkilot vakili Sem Konveyning ma’lum qilishicha, ayol 1 300 funt sterlingdan ortiq mablag‘ yig‘ishga muvaffaq bo‘lgan.

Xelganing jiyanlari Jeki Rouz va Juli Pris uni mustaqil va qat’iyatli ayol sifatida ta’riflagan. Ularning aytishicha, Xelga uzoq vaqtdan beri noodatiy ish qilishni istagan va 99 yoshida ham faol ekanini ko‘rsatmoqchi bo‘lgan.

Avvalgi rekord sohibi, 97 yoshli Betti Bromeyj ham Xelgani tabriklagan. U 100 yoshga to‘lgach, yana samolyot qanotida uchib, rekordni qaytarib olishga umid qilayotganini hazil tariqasida bildirgan. Betti bungacha olti marta qanotda parvoz qilgan.