Toshkent shahridagi “Brasserie Park” restorani oldida 17 yoshli kurer bilan janjallashib, uni haqorat qilgan erkak 5 sutkaga ma’muriy qamoqqa olindi. Bu haqda QALAMPIR.UZ sud hujjatlariga tayanib xabar berdi.

Sud hujjatlariga ko‘ra, hodisa 17-oktyabr kuni soat 15:30 atrofida Islom Karimov ko‘chasida joylashgan restoran oldida sodir bo‘lgan. “ONE MORE” MCHJda haydovchi bo‘lib ishlaydigan S.R. skuterda harakatlanayotgan kurerga bu hududda yurmasligi kerakligini aytgan. Kelib chiqqan kelishmovchilik ortidan u kurerni haqorat qilgan.

Voqea aks etgan video ijtimoiy tarmoqlarda tarqalib, keng muhokamalarga sabab bo‘lgan. Videoda restoran xodimi kurerning hududga skuterda kirib kelishi mijozlarga xalaqit berayotganini aytib, uni haqorat qilgani aks etgan. Shundan so‘ng “Moviy gumbazlar” xiyobonida joylashgan restoran yozgi maydonchasida qonunbuzilishlar aniqlanib, hudud qonunchilik talablariga muvofiqlashtirilgan.

Sud majlisida S.R. aybiga qisman iqror bo‘lib, jahl ustida kurerni so‘kkanini tan olgan va qilmishidan pushaymonligini bildirgan. Sud uning harakatlarini Ma’muriy javobgarlik to‘g‘risidagi kodeksning 183-moddasi — mayda bezorilik deb baholab, 5 sutka ma’muriy qamoq jazosi tayinlagan.

Ichki ishlar xodimlarining qonuniy talablariga bo‘ysunmaslik va haqorat qilish bo‘yicha ayblovlar tegishli dalillar bilan tasdiqlanmagani sababli ishning ushbu qismlari tugatilgan. Shuningdek, S.R.dan maxsus qabulxonada saqlash xarajatlari uchun 330 ming so‘m undirish belgilangan.