Bugun, 8-aprel kuni Tashqi ishlar vaziri Abdulaziz Kamilov va Shvetsiya Qirolligi Tashqi ishlar vaziri Ann Kristin Linde ikki mamlakat o‘rtasida diplomatik munosabatlar o‘rnatilganining 30 yilligi munosabati bilan o‘zaro tabrik almashdilar.

A.Kamilov maktubida O‘zbekiston Shvetsiyani Yevropadagi ishonchli hamkor deb bilgan holda, ushbu mamlakat bilan siyosiy, savdo-iqtisodiy va madaniy sohalarda uzoq muddatli va ko‘p qirrali hamkorlikni mustahkamlashga katta ahamiyat berishi taʼkidlangan.

A.K.Lindening maktubida davlatlarimiz o‘rtasidagi do‘stlik va hamkorlik yuksak darajada ekanligi alohida qayd etilgan. Ikki tomonlama va xalqaro institutlar doirasida qator samarali muloqotlar amalga oshirilgani qayd etildi.

Tashqi ishlar vazirliklari rahbarlari o‘zaro hurmat, teng huquqlilik va do‘stlik tamoyillariga asoslangan O‘zbekiston-Shvetsiya hamkorligi bundan buyon ham ikki mamlakat xalqlari farovonligi yo‘lida rivojlanib borishiga ishonch bildirdi.

Eslatib o‘tamiz, avvalroq TIV Abdulaziz Kamilovning salomatligini yana-da chuqurroq tekshiruvdan o‘tkazish zarurati yuzaga kelgani sababli, vazir ixtisoslashgan tibbiy ko‘rikdan o‘tish va tegishli muolajalarni olish maqsadida xorijda davolanishni davom ettirayotgani haqida xabar bergan edi.

• Abdulaziz Kamilov
• O‘zbekiston
• Shvetsiya
• TIV