O‘zbekistonning suv resurslarini boshqarish sohasida amalga oshirayotgan islohotlari va xalqaro tashabbuslari yana bir bor e’tirof etildi. Bu BMT, Finlyandiya va Niderlandiya vakillari bilan o‘tkazilgan uchrashuvlarda qayd etildi. BMT Taraqqiyot dasturi rahbariyati O‘zbekistonning suv xo‘jaligida qisqa vaqt ichida erishgan natijalari va zamonaviy texnologiyalarni joriy etish borasidagi ishlarini yuqori baholadi. Tomonlar mazkur sohadagi hamkorlikni yanada kengaytirishga tayyor ekanini bildirdi.

Shuningdek, BMT vakillari O‘zbekiston tashabbusi bilan Samarqand shahrida o‘tkazilishi rejalashtirilayotgan suv tejash bo‘yicha Butunjahon forumini qo‘llab-quvvatladi. Mazkur forumni global muloqot maydoniga aylantirish bo‘yicha tashabbusga ijobiy munosabat bildirildi. Finlyandiyaning suv masalalari bo‘yicha maxsus elchisi Antti Rautavaara O‘zbekistonda suv xavfsizligi davlat siyosatida muhim yo‘nalishga aylanganini ta’kidladi. Uchrashuvda transchegaraviy suv resurslarini boshqarish, tajriba almashish va qo‘shma loyihalarni amalga oshirish masalalari muhokama qilindi.

Niderlandiya vakillari bilan muloqotda esa iqlim o‘zgarishi sharoitida suv resurslaridan samarali foydalanish, xalqaro hamkorlik va Yevropa tajribasini qo‘llash imkoniyatlari ko‘rib chiqildi. Uchrashuvlar O‘zbekistonning suv diplomatiyasi va barqaror rivojlanish sohalarida xalqaro hamkorlikni kengaytirish borasidagi o‘rni tobora mustahkamlanayotganini ko‘rsatdi.