Anqarada o‘tayotgan NATO sammiti doirasidagi rasmiy kechki qabul nafaqat diplomatik uchrashuvlar, balki birinchi xonimlar va ayol yetakchilarning nafis liboslari bilan ham e’tibor markazida bo‘ldi. Bu haqda Habertürk xabar berdi. Mehmonlarni Turkiya prezidenti Rajab Toyyib Erdo‘g‘anning rafiqasi Emine Erdo‘g‘an to‘q ko‘k rangdagi, milliy uslub elementlari aks etgan libosda kutib oldi.

U ushbu libosni avval ham, 2017-yil 29-oktabr kuni Turkiya Respublikasi tashkil topgan kun munosabati bilan Prezidentlik majmuasida o‘tkazilgan rasmiy marosimda kiygan edi. Fransiya prezidenti Emmanuel Makron bilan tashrif buyurgan Brijit Makron esa tizzadan past uzunlikdagi qora klassik libosni tanladi.

U obrazini kichik qora sumka bilan to‘ldirib, sodda va nafis fransuz uslubini namoyish etdi. Ruminiya prezidenti Nikushor Dan bilan kelgan Mirabela Gradinaru yelka qismidagi yopinchig‘simon detallarga ega moviy uzun libosi bilan e’tiborni tortdi. Tabiiy turmaklangan soch turmagi uning obraziga yengillik baxsh etdi. Chexiya bosh vaziri Andrey Babishni kuzatib kelgan Monika Babishova esa oq rangdagi uzun libosni tanladi. Libosning yeng qismidagi hajmli bezaklar, brilliant ziraklar va oq sumka uning obrazini yanada nafis ko‘rsatdi. Qayd etilishicha, NATO sammitining ilk kunidagi rasmiy qabul nafaqat xalqaro xavfsizlik va geosiyosiy masalalar muhokama qilingan diplomatik tadbir, balki birinchi xonimlar va ayol yetakchilarning uslubi namoyish etilgan yorqin oqshom sifatida ham yodda qoldi.