Pokistonda K2 Airways aviakompaniyasiga tegishli Boeing 737-400 yuk samolyoti Arabiston dengizi ustida radarlardan g‘oyib bo‘ldi. Hozirda harbiylar va qutqaruv xizmatlari samolyotni qidirmoqda. Bu haqda The Express Tribune xabar berdi. Ma’lum qilinishicha, samolyot Sharjadan Karachi shahriga parvoz qilayotgan bo‘lgan. U Karachi portidan taxminan 250 kilometr g‘arbda radarlar ekranidan yo‘qolgan. Bortda ekipajning besh nafar a’zosi bo‘lgan.

Pokiston aeroportlar boshqarmasi (PAA) ma’lumotiga ko‘ra, radarlar samolyotning keskin balandlik yo‘qotgani va yo‘nalishini o‘zgartirganini qayd etgan. Bundan bir necha daqiqa avval esa uchuvchi navigatsiya tizimida nosozlik yuzaga kelgani haqida xabar bergan. Flightradar24 kuzatuv xizmati ADS-B tizimidan olingan dastlabki ma’lumotlar ehtimoliy aviahalokat yuz bergan bo‘lishi mumkinligini ko‘rsatgan. Samolyot qulashi taxmin qilinayotgan hududga Pokiston Harbiy-dengiz kuchlarining PNS Zulfiqar kemasi hamda Saab 2000 Erieye uzoq masofali radar samolyoti yuborilgan.

Qidiruv-qutqaruv ishlariga Pokiston milliy kemachilik korporatsiyasining Lahor kemasi ham jalb etilgan. Ma’lumotlarga ko‘ra, ushbu Boeing 737-400 dastlab yo‘lovchi samolyoti sifatida xizmat qilgan. U 1999-yilda Aeroflot, 2004-yilda Garuda Indonesia aviakompaniyasi tarkibida parvoz qilgan. 2012-yilda esa yuk tashishga moslashtirilib, TNT Airways va keyinchalik ASL Airlines tomonidan foydalanilgan. Eslatib o‘tamiz, Pokistondagi so‘nggi yirik aviatsiya halokati 2020-yilda sodir bo‘lgan. O‘shanda Pakistan International Airlines samolyoti Karachi aeroportiga qo‘nish chog‘ida halokatga uchrab, bortdagi 99 kishidan 97 nafari halok bo‘lgan edi.