Bugun, 7-iyul kuni Ispaniya milliy terma jamoasi 2026 yilgi Jahon chempionati 1/8 finalida Portugaliyani 1:0 hisobida mag‘lub etib, chorak final yo‘llanmasini qo‘lga kiritdi. Texas shtatining Arlington shahrida bo‘lib o‘tgan uchrashuvdagi yagona golni asosiy vaqtga qo‘shib berilgan 90+1-daqiqada Mikel Merino kiritdi. Shu tariqa, Krishtianu Ronaldu boshchiligidagi Portugaliya terma jamoasi mundialdagi ishtirokini nimchorak finalda yakunladi.

Endilikda Ispaniya chorak finalda AQSH – Belgiya juftligi g‘olibiga qarshi maydonga tushadi. Shuningdek, Ispaniya darvozaboni Unai Simon Jahon chempionatlari tarixida gol o‘tkazmasdan o‘tkazgan daqiqalari sonini 609 daqiqaga yetkazib, o‘z rekordini yangiladi. Ispaniya esa 2026 yilgi mundialda hozirgacha o‘z darvozasidan gol o‘tkazmagan yagona terma jamoa bo‘lib qolmoqda.