AQSh prezidenti Donald Tramp 6-iyul kuni Oq uyda jurnalistlar bilan suhbatda Eron bilan muzokaralar borasida keskin bayonot berdi. “Biz yo kelishuvga erishamiz, yoki ishni oxiriga yetkazamiz. Buni oxiriga yetkazish qiyin bo‘lmaydi. Men kelishuvni afzal ko‘raman, chunki 91 million aholiga zarar yetkazishni istamayman”, — dedi Tramp. U, shuningdek, AQSH Eron infratuzilmasiga qisqa vaqt ichida jiddiy zarba bera olishini ta’kidlab, Tehronga nisbatan harbiy harakatlar ehtimoli haqidagi ogohlantirishlarini yana bir bor takrorladi. Bunga javoban Eron Milliy xavfsizlik oliy kengashi kotibi Muhammad Boqir Zolqadr Trampning bayonotlarini “xayoliy” deb atadi. “Eronliklar tahdid tilini tushunmaydi.

Shu sababli Eron xalqi bilan hurmat bilan gaplashing, aks holda biz boshqa tilda javob beramiz”, — dedi u. Zolqadrning ta’kidlashicha, so‘nggi mojarolardan keyin Eron zaiflashmagan, aksincha, mamlakat ichida birlik va qat’iyat yanada kuchaygan. Ma’lumot uchun, AQSH va Eron o‘rtasidagi bilvosita muzokaralarning navbatdagi bosqichi o‘tgan hafta yakunlangan bo‘lsa-da, tomonlar hozircha barqaror kelishuvga erisha olgani yo‘q.