Buxoro viloyatida havo harorati 44–45 darajagacha ko‘tarilishi kutilayotgani sababli barcha maktabgacha ta’lim tashkilotlari faoliyati 15–17-iyul kunlari vaqtincha to‘xtatildi. Bu haqda viloyat Maktabgacha va maktab ta’limi boshqarmasi ma’lum qildi. Qaror Buxoro viloyati Sanitariya-epidemiologik osoyishtalik va jamoat salomatligi boshqarmasining xulosasi asosida qabul qilingan.

Davlat bog‘chalari 20-iyuldan boshlab odatdagi tartibda o‘z faoliyatini davom ettiradi. Maktabgacha va maktab ta’limi vazirligi esa bog‘chalarni yopish bo‘yicha barcha hududlarga yagona topshiriq berilmaganini, bunday qarorlar hududlardagi ob-havo sharoiti va mutasaddi idoralarning xulosalari asosida qabul qilinayotganini bildirdi.