Belarusdagi tergov hibsxonasida saqlanayotgan o‘zbekistonlik ayolning farzandi dunyoga keldi. Chaqaloq zarur huquqiy va konsullik tartib-taomillari bajarilgach, O‘zbekistonga olib kelinib, yaqin qarindoshlari qaramog‘iga topshirildi. Bu haqda Oliy Majlisning Inson huquqlari bo‘yicha vakili (Ombudsman) ma’lum qildi. Qayd etilishicha, ayol homiladorligi davrida tergov hibsxonasida saqlanayotgan bo‘lib, u farzandi tug‘ilgach, uni O‘zbekistondagi yaqinlari qaramog‘iga topshirishda amaliy yordam so‘ragan.

Murojaat nazoratga olinib, tegishli davlat organlari, O‘zbekistonning Belarusdagi diplomatik vakolatxonasi hamda MDH Inson huquqlari bo‘yicha komissiyasi hamkorligida zarur hujjatlar rasmiylashtirilgan. Natijada joriy yil iyul oyida chaqaloq O‘zbekistonga olib kelinib, yaqin qarindoshlari qaramog‘iga topshirildi.