O‘zbekistonda kuzatilayotgan anomal issiq munosabati bilan Mehnat inspeksiyasi ochiq havoda ishlovchi xodimlarni himoya qilish bo‘yicha ish beruvchilar bajarishi shart bo‘lgan talablarni e’lon qildi. Unga ko‘ra, soat 11:00 dan 16:00 gacha ochiq havodagi ishlarni qisqartirish yoki vaqtincha to‘xtatish, og‘ir jismoniy mehnatni cheklash tavsiya etiladi.

Shuningdek, ish beruvchilar xodimlarni doimiy ravishda toza ichimlik suvi, soyali yoki sovitiladigan dam olish joylari hamda issiqdan himoya qiluvchi maxsus kiyimlar bilan ta’minlashi shart. Bundan tashqari, issiq sharoitda ishlovchi xodimlar tibbiy ko‘rikdan o‘tgan bo‘lishi, ularga issiq urishining alomatlari tushuntirilishi va zarurat tug‘ilganda zudlik bilan birinchi tibbiy yordam ko‘rsatilishi lozim. Mehnat inspeksiyasi ushbu talablarga rioya qilish tavsiya emas, balki ish beruvchining qonuniy majburiyati ekanini eslatdi.