Ertaga, 1-fevraldan boshlab “Tashabbusli byudjet” loyihasining 2024-yilgi 1-mavsumi uchun tashabbuslar qoldirish boshlanadi. 1-mavsum uchun jami 3 trln so‘m mablag‘ ajratilmoqda.

Har bitta tashabbus uchun maksimum 1 mlrd 360 mln so‘m mablag‘ so‘rash mumkin.

Joriy yildan boshlab eng katta yangilik – bu ovoz berishda sog‘lom raqobat muhitini yaratish maqsadida “Bir fuqaro – bir ovoz” tizimi joriy etiladi.

Ya’ni, endi nomida nechta sim-kartasi bo‘lishidan qat’i nazar 1 kishi faqat 1 marta ovoz bera oladi. Masalan, bir shaxsning nomida Uzmobile, MobiUz, Ucell va Beeline raqamlari bor bo‘lsa ham u faqat 1 marta ovoz beradi, keyingi safar boshqa kompaniya raqamidan yana ovoz bermoqchi bo‘lsa, unga rad javobi keladi.

Bu orqali yuzlab sim-karta sotib olib, ovozlar sonini sun’iy ko‘paytirishga chek qo‘yiladi.

Shuningdek, bundan buyon “Tashabbusli byudjet” doirasidagi loyihalar tashabbuskorlar, mahalla raisi va faollarining ish sifati yuzasidan roziligi olinganidan keyingina foydalanishga qabul qilish tartibi joriy etilishi kutilmoqda. Bu orqali ishni sifatsiz topshiradiganlarga qarshi kurashiladi.

• Beeline
• Byudjet