Eron ichki muammolarni hal etish jarayonida uchinchi davlatlar tomonidan har qanday aralashuvga yo‘l qo‘ymaydi. Bu haqda Islom Respublikasi Tashqi ishlar vazirligining rasmiy vakili Ismoil Baghay AQSh prezidenti Donald Trampning eronlik namoyishchilarga yordam berish haqidagi bayonotlariga javoban ma’lum qildi.

“Eron xalqi ichki masalalarni hal etish uchun o‘zaro muloqot va hamkorlik jarayoniga hech qanday xorijiy aralashuvga yo‘l qo‘ymaydi”, — deb yozdi u X ijtimoiy tarmog‘idagi sahifasida.

Ismoil Baghay, shuningdek, amerikalik siyosatchilarning go‘yoki “eron xalqini qutqarish” niqobi ostida amalga oshirgan avvalgi harakatlariga e’tibor qaratdi. Jumladan, 1953-yilda AQSh va Buyuk Britaniya maxsus xizmatlari tomonidan Eronda tashkil etilgan davlat to‘ntarishi, shuningdek, Vashingtonning Isroil tomonidan Islom Respublikasiga qarshi boshlangan 12 kunlik urushdagi ishtiroki shular jumlasidandir.

Avvalroq Donald Tramp Truth Social ijtimoiy tarmog‘ida, “Agar Eron o‘z odatiga ko‘ra tinch namoyishchilarni o‘qqa tutsa va shafqatsizlarcha o‘ldirsa, AQSh ularga yordamga keladi. Biz shay holatdamiz va harakatga tayyormiz”, –  deb yozgan edi. O‘z navbatida, Eron oliy rahbarining maslahatchisi Ali Shamxoniy mamlakat ichki ishlariga har qanday bahona ostida aralashishga uringan shaxslarning “qo‘li kesilishini” qat’iyan ta’kidladi.

• AQSh
• Eron
• Namoyish
• norozilik