Oʻzining provokatsion harakatlari bilan mashhur boʻlgan Isroil milliy xavfsizlik vaziri Itamar Ben-Gvir bugun, 3-yanvar kuni ertalab Islom muqaddas maskani – bosib olingan Sharqiy Quddusdagi Al-Aqso masjidiga bostirib kirib, reyd o‘tkazdi.

Ben Gvir Isroil politsiyasining shiddatli himoyasi ostida Harami Sharifga (Maʼbad togʻiga) kirdi.

Milliy xavfsizlik vaziri islomning uchinchi muhim ziyoratgohi hududiga kirib kelgan Isroil Vazirlar Mahkamasining so‘nggi besh yil ichidagi birinchi aʼzosi boʻldi.

Vazirning Masjid al-Aqsoga “ziyorat qilayotgani”ni e’lon qilishi va u yerdagi xatti-harakatlari musulmon dindorlarning keskin noroziligiga sabab bo'lib, bosib olingan Falastin hududlarida keskinlikni oshirdi.

Ben-Gvir, yangi tuzilgan hukumatda vazir bo'lishdan oldin, Knesset [Isroil Davlatining bir palatali vakillik va qonun chiqaruvchi organi, uning parlamenti] a'zosi bo'lgan davrida Masjid al-Aqso bosqinlari, falastinliklarga qarshi zo'ravonlik harakatlarini rag'batlantirish, ksenofobiya va etnik adovatga chaqirish bilan mashhur bo‘lgan.

• Falastin
• Isroil
• Masjid