SAXAL kuchlari 6-iyul kuni kechqurun Yamanning Hodeyda, Ras-Isa va As-Salif portlari hamda Ras-Qanatib elektr stansiyasiga zarba bergani haqida xabar berdi.

“Ro‘yxatda keltirilgan portlar husiylar tomonidan Isroil davlati va uning ittifoqchilariga qarshi terrorchilik amaliyotlarini o‘tkazishda foydalaniladigan qurol-yarog‘larni tashishda foydalaniladi”, deyilgan SAXAL xabarida.

Qo‘shimcha qilishicha, Ras-Isa portida 2023-yil noyabrida husiylar tomonidan qo‘lga olingan Galaxy Leader yuk kemasi yo‘q qilingan. SAXAL ma’lumotlariga ko‘ra, Yaman husiylari boshqa kemalar harakatini kuzatish maqsadida unga radar o‘rnatgan.

Isroil mudofaa vaziri Israel Kas husiylarga qarashli portlar va elektr stansiyasiga harbiy-havo kuchlari tomonidan hujum qilinganini tasdiqladi va bu operatsiya nomini “Qora bayroq” deb atadi. Ayni paytda husiylar “Yaman havo kuchlari Isroilning tajovuzkorligiga qarshi turishini” bildirgan. Shuningdek, Tel-Avivdagi Ben-Gurion xalqaro aeroportiga gipertovushli ballistik raketa bilan muvaffaqiyatli zarba bergani haqida xabar berdi.

• Havo hujumi
• Isroil
• Yaman