O‘zbekistonda anomal issiq sabab soat 10:00 dan 17:00 gacha ochiq havoda xodimlar hayoti va sog‘lig‘iga xavf tug‘dirishi mumkin bo‘lgan ishlarni vaqtincha to‘xtatish hamda moslashuvchan ish rejimini joriy etish tavsiya qilindi.

Bu haqda Davlat mehnat inspeksiyasi tomonidan barcha hokimliklarga yuborilgan ko‘rsatmada ma’lum qilingan. Mazkur choralar ochiq havoda mehnat qilayotgan obodonlashtirish xodimlarining hayoti va sog‘lig‘ini himoya qilish maqsadida belgilangan.

Ko‘rsatmaga ko‘ra, ish beruvchilar:

• xodimlarni yetarli miqdorda sifatli ichimlik suvi bilan ta’minlashi;
• quyosh nuri va yuqori haroratdan himoyalangan dam olish joylarini tashkil etishi;
• majburiy tibbiy ko‘rikdan o‘tmagan yoki ishga yaroqsiz deb topilgan shaxslarni ishga jalb qilmasligi;
• xodimlarni shaxsiy himoya vositalari bilan ta’minlashi;
• mehnat va dam olish rejimini qayta ko‘rib chiqishi shart.

Shuningdek, yuqori harorat ta’sirida sog‘lig‘i yomonlashgan xodimlarga zudlik bilan birinchi tibbiy yordam ko‘rsatilishi lozimligi ta’kidlangan. Davlat mehnat inspeksiyasi ko‘rsatmalar ijrosi nazorat qilinishini, talablarni buzgan shaxslar esa qonunchilikka muvofiq javobgarlikka tortilishini bildirgan.