Tramp JCH tugashi bilanoq Eronni bombardimon qilishni buyurdi

AQSH prezidenti Donald Tramp 2026-yilgi futbol bo‘yicha Jahon chempionati finali bo‘lib o‘tgan stadionni tark etganidan bir necha soniya o‘tib, Eronni bombardimon qilishni buyurdi. Yangi buyruq haqida AQSH Markaziy qo‘mondonligi (CENTCOM) xabar berdi.

Eronga qarshi yangi — to‘qqizinchi zarbalar to‘lqini Toshkent vaqti bilan soat 04:00 da boshlandi. Mamlakatning bir nechta shahrida — Tabriz, Chobahor, Konarak va Bandar-Imom Xomayniyda portlashlar eshitildi. Aynan qaysi obyektlar o‘qqa tutilgani hozircha ma’lum emas. Eronning ushbu to‘rt shahri turli ixtisoslikka ega strategik, iqtisodiy va tarixiy markazlar hisoblanadi.

“Bu zarbalar Eronning Hormuz bo‘g‘ozi orqali o‘tayotgan tijorat kemalari va fuqarolik dengizchilariga hujum qilish uchun foydalanadigan harbiy salohiyatini zaiflashtirishda davom etadi”, deyiladi CENTCOM xabarida.

Hujum fonida Brent markali neft narxi bir barrel uchun 90 dollardan oshib ketdi, bu iyun oyidan beri eng yuqori ko‘rsatkichdir. O‘z navbatida, AQSHning Bahrayndagi elchixonasi barcha Amerika fuqarolariga ehtiyotkor bo‘lish va mahalliy hokimiyat tavsiyalariga amal qilish bo‘yicha ko‘rsatma berdi.

CENTCOM, shuningdek, Iordaniyadagi hujum oqibatida shu vaqtgacha bedarak yo‘qolgan deb hisoblangan uchinchi amerikalik harbiy xizmatchining jasadi topilganini ma’lum qildi. Uning shaxsi hali aniqlanmagan. Eron AQSH hujumlariga javoban 17-iyul kuni Iordaniyaga zarba bergandi. O‘shanda ikki nafar harbiy halok bo‘lgan, biri esa bedarak yo‘qolgandi.

“Bu kecha ularga yana juda qattiq zarba berdik. Biz buni uch nafar buyuk vatanparvar sharafiga qildik”, dedi Tramp Jahon chempionati finalidan so‘ng Vashingtonga qaytar ekan.

Urush boshlanganidan buyon halok bo‘lgan amerikalik harbiylar soni 16 nafarga yetdi, 420 dan ortig‘i esa jarohatlandi.

Eron raketalari nishonlarga zarba berishda AQSHning havo hujumidan mudofaa tizimlarini chetlab o‘tmoqda. Xususan, Tehron hujum paytida yuqori tezlikda uchadigan va yerga yaqinlashganda manyovr qilish xususiyatiga ega raketalardan foydalanmoqda.

Eron armiyasi 19-iyul kuni ertalab Kuvaytdagi Amerika harbiy aktivlari va texnikalariga dronlar bilan zarba berdi. Hujum oqibatida “Al-Adiri” lageri va “Ali As-Salem” aviabazasi nishonga olindi. Ushbu bazalar o‘tgan haftadan buyon Eronning Fors ko‘rfazidagi AQSH aktivlari hamda ittifoqchilariga qarshi hujumlari doirasida o‘qqa tutilmoqda.