Prezident Shavkat Mirziyoyev iqtidorli boshqaruvchilar va yangi avlod rahbarlarini saralash hamda 2030-yilgacha milliy kadrlar zaxirasini shakllantirish bo‘yicha yangi tizim taqdimoti bilan tanishdi. Yangi tizimga ko‘ra, rahbar kadrlar endilikda an’anaviy hujjatlar emas, balki bilim, tajriba, liderlik salohiyati va strategik fikrlashni qamrab oluvchi portfolio asosida baholanadi. Har ikki yilda 500 nafar istiqbolli boshqaruvchi saralanib, 2030-yilgacha 1,5 ming nafar yuqori salohiyatli rahbardan iborat milliy kadrlar zaxirasini shakllantirish rejalashtirilgan.

Shuningdek, agrar soha, sog‘liqni saqlash, tadbirkorlik, sud-huquq, ta’lim, axborot texnologiyalari va sun’iy intellekt yo‘nalishlarini qamrab oluvchi «TOP-100» ochiq tanlovini yo‘lga qo‘yish taklif etildi. Bundan tashqari, 2026-yil 1-oktabrdan career.edu.uz platformasida «Xorijdagi talabalar» moduli ishga tushiriladi. Ushbu tizim orqali xorijda tahsil olayotgan yoshlar davlat idoralari va xususiy korxonalarga biriktirilib, amaliyot o‘tashi, ish beruvchilar bilan hamkorligi hamda keyinchalik ishga joylashishi qo‘llab-quvvatlanadi. Taqdimotda «El-yurt umidi» jamg‘armasi faoliyatini yanada takomillashtirish, iqtidorli yoshlarning xorijdagi ta’limi, startaplari va ilmiy tadqiqotlarini grantlar orqali qo‘llab-quvvatlash masalalari ham muhokama qilindi.