Ijtimoiy tarmoqlarda Jizzax viloyatida joylashgan manzil-koloniyadan 2 mahkumning qochib ketgani bilan bog‘liq xabar tarqaldi. Ichki ishlar vazirligi huzuridagi Jazoni ijro etish departamenti holat yuzasidan rasmiy munosabat bildirdi.

Qayd etilishicha, 3-mintaqaviy hudud 30-son manzil-koloniyasida jazo muddatini o‘tab kelgan mahkum A.K. sog‘lig‘i sababli Zafarobod tumani tibbiyot birlashmasining “Terapiya” bo‘limiga davolanish uchun yotqizilgan.

Qayd etilishicha, 4-yanvar kuni u soat 22:30 larda tibbiyot birlashmasidan ruxsatsiz, noma’lum tomonga ketib qolganligi aniqlangan.

Xuddi shu kuni soat 23.15 larda muassasada o‘tkazilgan ko‘rik vaqtida mahkum M.N.ning ham koloniya hududida yo‘qligi aniqlangan.

IIV huzuridagi Jazoni ijro etish departamenti tomonidan ushbu mahkumlarni tartibbuzarlik sodir etib, belgilangan hududlardan ketib qolgani uchun qidirish ishlari olib borilmoqda.

Qidiruv-surishtiruv ishlari yakuni yuzasidan jamoatchilikka qo‘shimcha ma’lumot berilishi ma’lum qilingan.

• Jizzax
• Qamoqxona
• Qochoq