London universiteti (“MRC Unit for Lifelong Health and Aging”) mutaxassislari tomonidan olib borilgan ko‘p yillik tadqiqotga ko‘ra, hatto kichik miqdordagi jismoniy faollik demensiyani (xotira, fikrlash, xulq-atvor va kundalik ishlarni bajarish qobiliyatining pasayishi) rivojlanish xavfini kamaytiradi.

Ta’kidlanishicha, buning uchun butun umr sport bilan shug‘ullanish shart emas.

Keksalikda jismoniy faollik miya faoliyatini yaxshilashi uzoq vaqtdan beri isbotlangan. Biroq katta yoshdagi insonlarda kognitiv funksiyalarga ijobiy ta’sir ko‘rsatishi uchun mashg‘ulotlarni qancha va qaysi yoshda boshlash kerakligi hali fanga noma’lum edi. Endi bu savolga javob bor.

“Neurology, Neurosurgery & Psychiatry” (“Nevrologiya, Neyroxirurgiya & Psixiatriya”) jurnalida chop etilgan tadqiqotda mualliflar 30 yil davomida 1500 ga yaqin odamning jismoniy faolligini kuzatib, 69 yoshida ularning kognitiv holati, og‘zaki xotirasi va qayta ishlash tezligini sinab ko‘rdi. Eng yaxshi ko‘rsatkich sport bilan shug‘ullanganlarga tegishli bo‘lgan.

Ammo 50-60 yoshdan boshlab mashg‘ulotlarni boshlagan ishtirokchilar ham umuman sport bilan shug‘ullanmagan “pensioner”larga qaraganda 70 yoshida yaxshi natija ko‘rsatishi kutilmagan holat edi. Shu bilan birga, sport zaliga ko‘p vaqt sarflashning hojati yo‘qligi ma’lum bo‘ldi. Hatto, oyiga bitta mashq qilish kifoya. Ammo hayot davomida jismoniy faollikni saqlab qolish eng yaxshi variant, deb xulosa qilishadi olimlar.

Boshqacha qilib aytganda, mashq qilishni boshlash uchun hech qachon kech emas. Bu har qanday yoshdagi inson salomatligi uchun kiritilgan sarmoyadir.

• Kasallik
• Mashg'ulot
• o‘rtacha umr ko‘rish yoshi