Kiyim javoni toʻlib-toshgan, kiyishga esa hech narsa yoʻq – bu ayollar va qizlarning koʻp takrorlaydigan gaplaridan biri. Biroq, bu yerdagi asosiy muammo javonda kiyishga arziydigan chiroyli liboslar yoʻqligida emas, ularni kerakli usulda uygʻunlashtira olmaslikda boʻladi. Biz bugun kundalik obrazlaringizga rang-baranglik bagʻishlash va har doim chiroyli obrazlar yaratishga yordam beradigan usullarni siz bilan oʻrtoqlashamiz.  

1-variant. Klassik liboslar
Erkaklarning klassik uslubdagi liboslariga oʻxshab ketadigan kiyimlar hozirda urfga kirgan. Bunday liboslarning qaysi birlari kundalik obrazlarga koʻproq mos kelishini koʻrib chiqamiz: 

– pidjak – toʻgʻri bichimga ega boʻlgan va uzunroq qilib bichilgan, ortiqcha bezaklar bilan ishlov berilmagan bunday libosni topish qiyinroq boʻlishi mumkin. Shuning uchun ham uni erkaklar boʻlimidagi liboslar orasidan qidirib koʻrsangiz boʻladi. Oddiy bichimdagi qora pidjak nafis koʻylak, kundalik obraz asosini tashkil qiluvchi jinsi va oq futbolka bilan aʼlo darajada uygʻunlashadi. 

– oq koʻylak – bu ham garderobning asosiy liboslaridan biri hisoblanadi. Uni har qanday uslubga xos liboslar bilan birga kiyishingiz mumkin, eng muhimi fantaziyani ishga solish kerak.  

– sokin rangdagi tolstovka – sport uslubidagi liboslar zamonamiz ayollarining garderobidan joy olganidan keyin tolstovkalarga boʻlgan talab ham oshib ketdi. Garderobingizda har doim uning kulrang, qora yoki oq rangdagi modellaridan biri boʻlsin. Tolstovkani nafaqat jinsi, balki kundalik uslubga xos koʻylaklar va jiddiy uslubdagi kostyumlar bilan ham kiysa boʻladi. 

2-variant. Bir hil rangdagi liboslar 
Turli hil rangdagi liboslarni oʻzaro uygʻunlashtirish oxirgi bir necha mavsumda urfga kirgan boʻlsa ham, total black haligacha oʻz dolzarbligini yoʻqotmagan. Bir hil rangdagi liboslardan umumiy obraz yaratish orqali hashamatli koʻrinishga erishish mumkin. Bu yerdagi eng muhim narsa – bir nechta oʻziga xosliklarni bilib olish.  

Birinchi navbatda bir hil ranglardan tashkil topgan obraz asosidagi liboslarni koʻrib chiqamiz. Ular bitta rangning bir nechta tuslarida boʻlishi mumkin. Misol uchun, och jigarrang koʻylakni qahvarang yubka bilan uygʻunlashtirish ajoyib va yorqin natija olishga yordam beradi. Tufli yoki botinkaning rangi liboslar rangiga mos kelishi shart emas. Ularning yorqin rangdagisini tanlasangiz ham boʻladi.

Har hil tuzilishga ega boʻlgan liboslardan yaratilgan autfit ham qiziqarli koʻrinadi. Misol uchun shoyi matosidan tikilgan koʻylakni toʻqilgan sviter, tivit kostyum, shifon bluza yoki jinsi bilan uygʻunlashtirsa boʻladi. Matolar borasida istalgancha tajribalar oʻtkazish mumkin, muhimi yakuniy natija ajoyib boʻlsin! 

3-variant. Qora koʻylak 
Universal obrazlar asosini tashkil qiladigan bunday koʻylak har bir ayol garderobidan joy olishi kerak. Fikrimizga qarshi chiqishga shoshilmang. Qora koʻylakni oʻzingizga yoqadigan uzunlik va bichimda tanlashingiz mumkin. Kimgadir mini yoqsa, kimdir midi yoki maksini xush koʻrib kiyadi. Eng muhimi, libos sizga yarashib turishi va qulay boʻlishi lozim. Qora koʻylak sotib olishda uning universal bichimda boʻlishiga eʼtibor bering, bunday koʻylakni restorandagi kechki ovqatga ham, ish boʻyicha uchrashuvga ham kiyib ketish mumkin. 
 

Eʼtibor bering: Libosning koʻrinishini poyabzal yoki aksessuarlar yordamida oʻzgartirib yuborish mumkin. Misol uchun casual uslubidagi obraz uchun oq keda kiyib, autfitni kichik ryukzak bilan toʻldiring. Romantik uslubdagi obrazni esa poshnali oyoq kiyim, klatch va uzun ziraklar yordamida yaratish juda oson. Ish boʻyicha uchrashuvga ketayotgan boʻlsangiz, obrazingiz qora koʻylak, jaket, klassik uslubdagi poyabzal, sumka va kumushrang soatdan iborat boʻlsin.

4-variant. Turli mavsumlarga xos liboslarni birlashtirish
Turli mavsumlarga xos liboslarni bitta obrazda birlashtirish ajoyib natija berishi mumkin. Albatta, qalin shuba bilan usti ochiq oyoq kiyim kiying demaymiz. Ammo, qayiqcha uslubidagi tufli bilan trenchni yoki harir koʻylakni uygʻunlashtirish yomon fikr emas. Bunday kombinatsiyalar obrazingizga oʻziga xoslik bagʻishlash bilan birga didingiz qanchalik nozik ekanligi ham koʻrsatadi.

Yozgi koʻylaklarni vodolazka bilan kiyish ham mumkin. Har bir libosdan noodatiy obrazlar yaratish uchun maksimal foydalaning. Oʻrtacha qalinlikdagi sviterlarni bahorning yomgʻirli kunlarida harir koʻylak ustidan kiyib olishingiz mumkin, shifonli sarafan ham vodolazka bilan aʼlo darajada uygʻunlashadi. Bunday obraz kuz fasliga ham, bahor va qishga  ham mos keladi, eng muhimi kerakli poyabzal va ustki libosni tanlab olish. Koʻylak tagidan koʻrinib turmaydigan uzun etiklar yoki ikki tomonlamali koʻylaklar ham ushbu obrazga mos keladi. 

5-variant. Simple things
Koʻpchilik qizlar mashhur yulduzlarga taqlid qilishadi. Xeyli Biber yoki Rozi Xantington Uaytlidek nafis obrazlar yaratishni kim ham istamaydi deysiz? Biroq, oddiy autfitlar ham yulduzlarning liboslaridan kam koʻrinmasligi mumkin. Boyfrend jinsi va  qora vodolazka ana shunday liboslar sirasiga kiradi. Agar koʻcha salqinroq boʻlsa, uning ustidan charm palto yoki klassik uslubdagi och jigarrang trench kiyib olishingiz mumkin.
Balki bu liboslar garderobingizda allaqachon bordir ham. Ularni oʻzaro uygʻunlashtirib koʻrishga harakat qiling. Goʻzallik – oddiylikda degan gap bejizga aytilmagan. Qora vodolazka va jinsi uygʻunligini buning yana bir isboti boʻladi. 

6-variant. Jinsining koʻpi boʻlmaydi
Jinsini xuddi shu matodan tikilgan kurtka bilan birga kiysangiz eng zamonaviy obrazni yaratgan boʻlasiz. Bunday obraz haqida koʻp oʻylash ham shart emas, muhimi ranglar bir-birini “boʻgʻib” qoʻymasa boʻlgani. Agar koʻrinishingiz zerikarli boʻlib qolishini istamasangiz, xorijlik yulduzlarga qarab ilhom olishingiz mumkin. Misol uchun, Gven Stefani jinsi kombinezonni shaffof botilyon va oʻzgacha printga ega boʻlgan kurtka bilan kiyishni xush koʻradi. Jinsi yubkani oq bluza yoki jinsi kofta bilan uygʻunlashtirish mumkin. Bu xonanda Beyonsening sevimli obrazlaridan biri. 

7-variant. Oqshom libosini kundalik kiyimlar bilan uygʻunlashtiramiz. 
Zamonaviy moda olami juda tez rivojlanyapti, avvallari buzilishi mumkin boʻlmagan deb hisoblangan qoidalarni bugun dizaynerlarning oʻzlari oʻzgartirishyapti. Klassik uslubdagi kostyum-shimni keda bilan, tolstovkani romantik uslubdagi koʻylak bilan, qalamcha uslubidagi yubkani noodatiy poyabzallar bilan ham kiyish mumkin. Stilistlar va dizaynerlar oqshom obrazlariga xos kiyimlarni kundalik ust-boshlar bilan kiyish mumkin ekanligini aytishyapti. 
Shunday ekan, pistonlar va munchoqlar bilan bezatilgan yubkani oq bluza va krossovka, jinsi shim va sport uslubidagi futbolkani yaltiroq ziraklar, shoyi matosidan tikilgan kalta oqshom koʻylagini erkin bichimdagi shim bilan kiyishga aslo ikkilanmang. 

8-variant. Kamar taqing 
Kamar taqishingiz bilan har qanday obraz avvalgi koʻrinishiga nisbatan yaxshiroq boʻladi. Ushbu aksessuar bel sohasida urgʻu berib, obrazning oʻziga xos bezagi boʻlib xizmat qiladi. Oddiy koʻrinishdagi, ortiqcha bezaklari boʻlmagan va oʻrta qalinlikka ega kamarni uzunroq jaket ustidan taqib olsangiz, zamonaviy autfit yaratiladi. Korset koʻrinishidagi kamar esa qalamcha uslubidagi koʻylaklarga mos keladi. Ingichka kamarlarni erkin bichimli koʻylaklar va keng sviterlar ustidan taqish mumkin.

• Foydali
• moda
• qiziqarli
• trend