Qoraqalpogʻistonda boʻlib oʻtgan voqealarni mustaqil ravishda oʻrganayotgan Komissiya aʼzolari Xorazm viloyatining Urganch shahridagi 11-son Tergov hibsxonasiga tashrif buyurib, u yerda saqlanayotgan shaxslarning yashash, ovqatlanish, tibbiy xizmatdan foydalanish hamda advokatlar va yaqin qarindoshlari bilan qisqa muddatli uchrashuv xonalardagi sharoitlar oʻrganishgan.

Shuningdek, Tergov hibsxonasida ushlab turilgan shaxslar bilan suhbatlashilgan. Xususan, boʻlib oʻtgan holatlar va voqealarda gumondor sifatida hibsga olingan Dauletmurat Tajimuratov bilan ham uchrashuv oʻtkazilgan.

Uchrashuv davomida D.Tajimuratov advokat bilan taʼminlanganini va advokatining u bilan uchrashishida hech qanday qarshiliklar yoʻqligini, oila aʼzolari bilan ham qisqa muddatli uchrashuv oʻtkazilganligini hamda posilka va yoʻqlovlar olayotganini maʼlum qilgan.

D.Tajimuratovning soʻzlariga koʻra, unga nisbatan tergov harakatlari davomida va tergov hibsxonasida hech qanday qiynoq, bosim yoki tazyiqlar boʻlmagan. Ovqatlarning sifati va hibsxonadagi boshqa sharoitlarga hech qanday eʼtirozi yoʻqligini bildirgan.

Komissiya aʼzolari tashrif davomida gumon qilinuvchilarning Tergov hibsxonasida saqlanayotgan paytida va tergov jarayonlarida hech qanday huquqlari buzilmagani hamda ruhiy va jismoniy qiynoq holatlariga yoʻl qoʻyilmaganiga guvoh boʻlgan.

• Maxsus komissiya
• Ombudsman
• Qoraqalpog‘iston