Har yili qish faslining ilk kunida Butunjahon nevrologlar kuni nishonlanadi. Aynan mana shu kuni Vashington AQSh poytaxti deb eʼlon qilingan, Antarktida kuni taʼsis etilgan.

Qoraqalpoq tiliga davlat tili maqomi berilgan kun

1989-yilning 1-dekabr kuni qoraqalpoq tiliga davlat tili maqomi berilgan. Ushbu til turk tillari oilasining qipchoq guruhiga kiradi. U qozoq va noʻgʻoy tillariga yaqin. Bugungi kunda 400 ming kishidan koʻproq aholi vakillari qoraqalpoq tilida muloqot qiladi. Ushbu tilning shimoli-sharqiy va janubi-gʻarbiy lahjalari mavjud.

Qoraqalpoq yozuvi 1928-yilgacha arab alifbosi asosida yozilgan, keyinchalik lotin alifbosiga oʻtgan. 1940-yilda kirill yozuviga oʻtkazilgan boʻlsa, 1994-yilda lotin alifbosi qaytadan joriy etilgan.

Antarktida kuni

1959-yilning 1-dekabr sanasida 12 ta mamlakat (keyinchalik ularga boshqa davlatlar ham qoʻshilgan) dunyoda hech boʻlmasa bitta tinch qitʼa boʻlishi kerak degan qarorga kelishadi. Bu yerda birorta ham harbiy baza boʻlmasligi kerak edi. Shundan beri har yili 1-dekabr sanasida Antarktida kuni nishonlanadi. Qiziq maʼlumot: Antarktida dunyodagi birorta ham mamlakatga tegishli emas, shuningdek bu yerning oʻz valyutasi bor.

Butunjahon nevrologlar kuni

Bosh miya taxminan 100 milliard neyrondan tashkil topgan. Agar ushbu neyronlar bitta chiziq koʻrinishida terib chiqilsa, uning uzunligi 966 kilometrni tashkil qiladi. Nevrologlar odamning markaziy va periferik asab tizimi kasalliklarini davolaydilar. Har yilning 1 dekabr sanasida nevrologlarning kasb bayrami nishonlanadi.

Vashington AQSh poytaxti deb eʼlon qilingan kun

1800-yilning 1-dekabr kuni Vashington AQShning poytaxti deb eʼlon qilingan. Uni mamlakatning poytaxti boʻlishi uchun atayin qurishgan. Amerika inqilobidan keyin koʻplab shtatlar va shaharlar oʻrtasida AQSh poytaxti aynan ularning hududida boʻlishi uchun kurash boshlangan. Kurashga tinch yoʻl bilan chek qoʻyish maqsadida yangi shahar qurishga qaror qilganlar.

Qurilish joyini AQShning birinchi prezidenti Jorj Vashington tanlab bergan. Yangi poytaxt hududi Xristofor Kolumb sharafiga Kolumbiya okrugi, shaharning oʻzi esa mamlakatning ilk prezidenti sharafiga Vashington deb atalgan.

• Tarix
• qiziqarli