Qozog‘istonda moliyaviy piramidadan katta zarar ko‘rgan ayol IIV binosi oldida o‘zini yoqib yubordi. U “Mudarabah Capital” moliyaviy piramidasiga nisbatan ochilgan jinoyat ishida jabrdiydalardan biri bo‘lgan.

U o‘z joniga qasd qilishi haqida bir kun oldin Instagram sahifasida post qoldirgan va unda Olmaota shahar politsiya boshqarmasi boshlig‘i o‘rinbosari Rustam Abdurahmonovni mazkur jinoiy ishni tezroq yopib yuborishga urinayotganlikda ayblagan. Shuningdek, u o‘zining o‘limida ham mazkur xodimni ayblashlarini so‘ragan.

Hozir ayol poytaxt shifoxonasining jonlantirish bo‘limida.

Rustam Abdurahmonovning maʼlum qilishicha, ushbu jinoyat ishi bo‘yicha 14 nafar shaxs gumonlanuvchi sifatida eʼtirof etilgan, ulardan ikki nafari “qamoqqa olish” sanksiyasi bilan xalqaro qidiruvga berilgan.

Ayni paytda ularga nisbatan Qozog‘iston Respublikasi Jinoyat kodeksining 217-moddasi 3-qismi “moliyaviy piramidani yaratish va boshqarish” bilan jinoyat ishi qo‘zg‘atilgan.

Uning so‘zlariga ko‘ra, jinoyat ishi yaqin kunlarda – jarayon ishtirokchilari materiallar bilan tanishib chiqishlari bilanoq sudga yuboriladi. Shuningdek, Abdurahmonov moddiy zararni qoplash masalalari sud tomonidan ko‘rib chiqilishini qayd etgan.

Mahalliy OAVning yozishicha, mazkur moliyaviy piramida mashhur qozog‘istonlik vayner (ijtimoiy tarmoqlar uchun qisqa videoroliklar ishlovchi)lar Meirjan Turebayev, Meirxan Sherniyazov va Azimjon Saidbayevlar moliyaviy piramidani yaratish va boshqarishda ayblanmoqda.

• IIV
• Moliyaviy piramida
• Qozog‘iston
• Suitsid