YIHS Rossiyaga qarshi qariyb 900 ta ishni yopdi.

Yevropa inson huquqlari sudi (YEIHS) resurslar yetishmasligi sabab Rossiyaga qarshi berilgan 879 ta individual shikoyatni ko‘rib chiqishni to‘xtatdi. Sud bu ishlar bo‘yicha zarur bo‘ladigan katta hajmdagi resurslarni sarflashni asosli deb hisoblamasligini bildirdi.

Yevropa inson huquqlari sudi (YEIHS) 3-sentyabr kuni Rossiyaga qarshi berilgan 879 ta individual shikoyatni ko‘rib chiqishni to‘xtatishga qaror qildi.

Strasburgda joylashgan sud bu qarorni mavjud resurslarni taqsimlash zarurati bilan izohlagan.

«Individual ishlarni ko‘rib chiqish uchun talab etiladigan katta hajmdagi sud resurslarini sarflashni asosli deb hisoblab bo‘lmaydi», - deyiladi sud bayonotida.

Ko‘rib chiqilishi to‘xtatilgan ishlar orasida Rossiyada siyosiy muxolifat vakillari va faollarga munosabat, repressiv deb baholangan qonunchilik, shuningdek so‘z va yig‘ilishlar erkinligining cheklanishi bilan bog‘liq shikoyatlar bor.

Sud bayonotida YEIHS shunga o‘xshash ishlar bo‘yicha o‘z pozitsiyasini avval ham yetarlicha bildirgani qayd etilgan.

Rossiya 2022-yilda Ukrainaga qarshi keng ko‘lamli urush boshlanganidan keyin Yevropa Kengashi a’zoligidan chiqarilgan.

Shundan keyin ham YEIHS Rossiyaning tashkilotdan chiqarilishigacha bo‘lgan davrda sodir bo‘lgan voqealarga oid ishlarni ko‘rib chiqishda davom etgan.

Ayni paytda Moskva YeIHSning o‘ziga nisbatan chiqarilgan qarorlarini tan olmasligini bildirgan va belgilangan pul kompensatsiyalarini to‘lashdan bosh tortmoqda.

YEIHS ma’lumotiga ko‘ra, 879 ta ishni ko‘rib chiqishni to‘xtatish to‘g‘risidagi qaror yakuniy hisoblanadi.

Biroq sud bu Rossiyaning xalqaro huquqiy javobgarligi bekor qilinganini anglatmasligini alohida ta’kidlagan.

Zarurat tug‘ilsa va tegishli holatlar yuzaga kelsa, ayrim ishlar bo‘yicha ish yuritish qayta tiklanishi mumkin.

Shu bilan birga, Rossiyaning Ukraina va Gurjiston bilan bog‘liq urushlariga oid ishlar YEIHS tomonidan ko‘rib chiqilishda davom etadi.