Stenford universiteti olimlari haftasiga 40 soatdan koʻp ishlash salomatlik uchun zararli ekanligini aniqlashdi. Ular oʻtkazilgan bir nechta tadqiqotlar natijasida mana shunday xulosaga kelganlar.

Maʼlum boʻlishicha, haftasida 50 soatdan koʻp ishlash samaradorlik koʻrsatkichining keskin tushib ketishiga olib keladi. Haftasida 55 soat ishlash esa unumdorlikning butunlay yoʻqolishiga sabab boʻladi. Tadqiqotchilarning aytishlaricha, haftasiga 40 soat ishlaydigan odamlar bundan koʻproq vaqtini ish uchun ajratadigan xodimlarga nisbatan yaxshiroq natijalarni qayd etishadi.

Avstraliya Milliy universiteti olimlari esa bir haftada 39 soatdan koʻp ishlash xodimning ruhiy holatiga zarar yetkazishi, depressiyaga sabab boʻlishi, baʼzida insult, diabet hamda onkologik kasalliklarini keltirib chiqarishini isbotlab berishgan.

Tadqiqotchilarning aytishlaricha, qoʻl mehnati bilan bir necha soat mobaynida tinimsiz shugʻullanish mumkin, chunki u aqliy faollikni talab qilmaydi. Ammo, aqliy mehnat bilan shugʻullanuvchi odamlarda ish samaradorligi yuqori boʻlishi uchun kuniga 4-5 soatdan koʻp vaqtni ish uchun ajratish tavsiya etilmaydi.

Shuni ham eʼtiborga olish kerakki, ishlash vaqtida miya 52 daqiqa mobaynida faol boʻladi, xolos. Shundan keyin 17 daqiqa dam olish samaradorlikni qayta tiklashga yordam beradi.

• Foydali
• qiziqarli
• salomatlik
• tadqiqot