31°
Kechasi 18°
Bugun O‘zbekiston Respublikasi Oliy sudida 2025-yilda odil sudlovni amalga oshirish borasida amalga oshirilgan ishlar yuzasidan matbuot anjumani bo‘lib o‘tdi. Tadbirda sud tizimida olib borilayotgan islohotlar, fuqarolar hamda tadbirkorlik subyektlarining huquq va qonuniy manfaatlarini sud orqali himoya qilishga qaratilgan choralar haqida ma’lumot berildi.
Anjumanda ta’kidlanishicha, mamlakatda “Inson qadri” g‘oyasi asosida amalga oshirilgan siyosiy-huquqiy jarayonlar doirasida yangi tahrirdagi Konstitutsiya qabul qilingan bo‘lib, unda fuqarolarning huquq va erkinliklari hamda qonuniy manfaatlarini himoya qilish kafolatlari mustahkamlangan.
Ma’lumotlarga ko‘ra, sudga murojaat qilish bilan bog‘liq jarayonlar to‘liq raqamlashtirilgan. Ariza topshirish, sud majlislarida ishtirok etish, sud hujjatlarini olish hamda ishlarning ko‘rilish holati haqida axborot olish Oliy sudning interaktiv xizmatlar portali orqali elektron shaklda amalga oshirilmoqda.
Shuningdek, jinoyat ish yurituvida inson huquqlarini himoya qilishni kuchaytirish maqsadida 2025-yil 1-yanvardan boshlab tergov sudyalari instituti joriy etilgani qayd etildi. Hozirda jinoyat ishlari bo‘yicha tuman va shahar sudlarida 263 nafar tergov sudyasi faoliyat yuritmoqda.
Davlat organlari bilan munosabatlarda fuqarolar va tadbirkorlik subyektlarining huquqlarini himoya qilishni takomillashtirish maqsadida ma’muriy sud ishlarini yuritish to‘g‘risidagi qonunchilikni rivojlantirish konsepsiyasi tasdiqlangan.
Matbuot anjumanida sud tizimini raqamlashtirish, “Raqamli sud” va “Aqlli sud” loyihalarini joriy etish, sud infratuzilmasini yaxshilash hamda sudyalar korpusini malakali kadrlar bilan ta’minlashga qaratilgan Prezident farmonlari haqida ham axborot berildi.
Oliy sud tomonidan sud amaliyotida yuzaga kelayotgan muammolar doimiy ravishda tahlil qilinayotgani, aniqlangan kamchiliklarni bartaraf etish yuzasidan normativ-huquqiy hujjatlar loyihalari ishlab chiqilayotgani ma’lum qilindi. Shu bilan birga, Oliy sud Plenumi tomonidan qonunchilikni qo‘llash masalalari yuzasidan qarorlar va tushuntirishlar qabul qilinayotgani qayd etildi.
Matbuot anjumani yakunida jurnalist va blogerlar o‘zlarini qiziqtirgan savollarga javob oldi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
