O‘zbekiston oliy o‘quv yurtlari va kasb-hunar kollejlarining diplomlari Germaniyada tan olinishiga erishish rejalashtirilmoqda.

Bu masala 1-aprel kuni O‘zbekiston investitsiyalar, sanoat va savdo vaziri o‘rinbosari Shohrux Gulamov Germaniyaning ta’lim va migratsiya sohasi mutaxassislaridan iborat delegatsiya bilan uchrashuvda muhokama qilingan. Muhokama davomida O‘zbekiston OTM va kollejlarini Germaniya Ta’lim vazirligining ANABIN axborot bazasiga kiritilishi ko‘rib chiqilgan.

ANABIN (Anerkennung und Bewertung ausländischer Bildungsnachweise) — Germaniya Ta’lim va tadqiqot vazirligining rasmiy ma’lumotlar bazasi bo‘lib, unda xorijiy diplomlar va ta’lim muassasalarining tan olinishi va baholanishi haqidagi ma’lumotlar bor.

Delegatsiya tarkibida Germaniya hududiy savdo-sanoat palatalarining direktorlari, shuningdek, GP Günter Papenburg AG ta’sischi kompaniyasi tomonidan tashkil etilgan investitsiya kompaniyalari rahbarlari ham bo‘lgan.

Shuningdek, uchrashuvda O‘zbekiston yoshlarini ilg‘or texnologiyalarga o‘rgatish va keyinchalik ularni Germaniya korxonalariga ishga joylashtirishni nazarda tutuvchi qo‘shma loyihalarni amalga oshirish, Germaniyalik mutaxassislarga O‘zbekistonda mehnat faoliyatini amalga oshirish uchun imtiyozlar berish kabi yo‘nalishlar bo‘yicha hamkorlik masalalari ham muhokama qilingan.

• Diplom
• Germaniya
• Oliy ta'lim
• O‘zbekiston