Oʻzbekiston Respublikasi Investitsiyalar, sanoat va savdo vazirligida vazir oʻrinbosari Akram Aliyev va Finlyandiyaning Markaziy Osiyodagi elchisi Ilkka Raisanen oʻrtasida uchrashuv boʻlib oʻtdi.

Shuningdek, uchrashuvda Finlyandiyaning Peikko Group, Elematic, AINS Group, Kone va East Office kabi yirik kompaniyalari vakillari ham ishtirok etgan.

Maʼlum qilinishicha, konstruktiv ruhda oʻtgan suhbat chogʻida yangi istiqbolli loyihalarni amalga oshirish imkoniyatlari koʻrib chiqildi. O‘zbekiston tomoni mamlakatdagi qulay ishbilarmonlik muhitining asosiy afzalliklarini taqdim etdi, shuningdek, uy-joy qurilishi va elektrotexnika mahsulotlari ishlab chiqarish kabi sohalardagi yangi sarmoyaviy tashabbuslar haqida ma’lumot berdi.

Finlyandiya kompaniyalari loyihalarga katta qiziqish bildirishdi va ularni amaliy amalga oshirishga imkon qadar tezroq o‘tish uchun loyihadan oldingi ishlarni boshlashga tayyor ekanliklarini bildirdilar. Loyihalarning bir qismi Finlyandiya texnologiyalari va tajribasidan foydalangan holda davlat-xususiy sheriklik formatida amalga oshiriladi.

Uchrashuv yakunlari bo‘yicha tomonlar muhokama qilingan barcha yo‘nalishlar bo‘yicha hamkorlikni chuqurlashtirish niyatlarini tasdiqladilar va 2025-yilga mo‘ljallangan harakatlar rejasini kelishib oldilar.

• Finlandiya
• O‘zbekiston
• qurilish