O‘zbekiston Respublikasi investitsiyalar, sanoat va savdo vazirligida Sloveniya savdo-sanoat palatasi ijrochi direktori Marjana Majerik boshchiligidagi Sloveniya Respublikasi ishbilarmon doiralari ishtirokida davra suhbati bo‘lib o‘tdi.

Tadbirda qishloq xo‘jaligi, sog‘liqni saqlash, qurilish, turizm, farmatsevtika, mashinasozlik, axborot texnologiyalari va boshqa sohalarda faoliyat yurituvchi 20 dan ortiq Sloveniya kompaniyalari vakillari ishtirok etdi.

Sloveniya tomoniga O‘zbekistonning investitsiya salohiyati, investorlar uchun amaldagi imtiyozlar va preferensiyalar, tadbirkorlarni qo‘llab-quvvatlash va himoya qilish choralari taqdim etildi.

Davra suhbati doirasida geologiya, qishloq xo‘jaligi, to‘qimachilik va charm sanoati, farmatsevtika va uy-joy qurilishi kabi sohalardagi aniq loyiha tashabbuslari muhokama qilindi.

B2B va B2G formatidagi uchrashuvlar o‘tkazildi, unda ishtirokchilar ishbilarmonlik hamkorligini kengaytirish imkoniyatlarini muhokama qildilar.

Tomonlar O‘zbekiston va Sloveniya o‘rtasidagi savdo-iqtisodiy munosabatlarni yanada rivojlantirish muhimligini ta’kidlab, sheriklik aloqalarini mustahkamlash va qo‘shma investitsiya loyihalarini amalga oshirishga o‘zaro qiziqish bildirdilar.

• Biznes
• O‘zbekiston
• Sloveniya