O‘zbekistonda sun’iy yomg‘ir yog‘dirish texnologiyasini joriy etish bo‘yicha pilot loyiha ishlab chiqiladi. Bu Prezidentning 2026-yilgi davlat dasturi to‘g‘risidagi farmonida ko‘zda tutilgan.

Hujjatga ko‘ra, Respublikaning chang-to‘zonlar tez-tez sodir bo‘ladigan hududlarida aholining salomatligini asrash uchun zarur tadbirlarni amalga oshirish maqsad qilingan. Ekologiya va iqlim o‘zgarishi milliy qo‘mitasi 2026-yil 1-martdan boshlab xorijiy tajribani o‘rgangan holda (Fransiya, Xitoy, Saudiya Arabistoni) sun’iy yomg‘ir yog‘dirish texnologiyasiga ilmiy asoslangan holda pilot amaliy loyihani ishlab chiqadi.

Pilot tajribalar doirasida kamida 3–5 ta amaliy sinov o‘tkaziladi. Bu orqali yog‘ingarchilik o‘zgarishi tabiiy fonga nisbatan 10–20 foizga o‘sishi ta’minlanadi.

Ushbu vazifa ijrosi uchun Qoraqalpog‘iston Respublikasi Vazirlar Kengashi, viloyatlar va Toshkent shahri, tuman (shahar) hokimliklari mas’ul etib belgilangan.

• Loyiha
• yomg‘ir